پاۆلوداردا قازاقشا جەتىك بىلەتىن وزگە ۇلتتىڭ وقۋشىلارى ءوزارا سايىستى
سايىسقا قالا مەكتەپتەرىنىڭ 7-8 - سىنىپ وقۋشىلارى قاتىسقان. ماقساتى- تىلدەردى دامىتۋ مەن قولدانۋعا ارنالعان وبلىستىق باعدارلاماسىن جۇزەگە اسىرۋ؛ قازاق ءتىلىن جەتىك مەڭگەرگەن مەكتەپ وقۋشىلارىنىڭ دەڭگەيىن انىقتاۋ، ءتىلدى ۇيرەنۋگە ىنتالاندىرۋ.
«سايىس 2 كەزەڭ بويىنشا ءوتتى. ىرىكتەۋ كەزەڭىنە 27 مەكتەپ كوماندالارى قاتىسىپ، فينالعا 18 مەكتەپ كومانداسىنىڭ قۇرامىندا 116 وقۋشى قاتىستى. سايىستىڭ اقتىق كەزەڭى 3 تاپسىرمادان تۇردى. سايىستىڭ قورىتىندىسى بويىنشا باس جۇلدەگە كەنجەكول مەكتەبىنىڭ «كەنجەكول ۇلاندارى» كومانداسى جەڭىپ الدى، 1- ورىنعا № 24 - ورتا مەكتەبىنىڭ «تالاپكەر» كومانداسى، Ⅱ- ورىندى - №17 - ورتا مەكتەپتىڭ «زامانداستار» كومانداسى مەن № 43 - مەكتەپتىڭ «اجار» كومانداسى يەلەندى. ال، Ⅲ ورىندى № 16 ليتسەي- مەكتەبىنىڭ «سوزگە شەشەن ۇلاندار» مەن № 28 مەكتەپتىڭ «جاس قىران»، № 30 ورتا مەكتەپتىڭ «سۇڭقار» كوماندالارى يەلەندى»، - دەيدى ۇيىمداستىرۋشىلار.
سايىسقا قالا مەكتەپتەرىنىڭ كوپشىلىگى قاتىسۋعا ىنتا ءبىلدىرىپ، جوعارى بەلسەندىلىك تانىتتى. وقۋشىلار قازاق ءتىلىن جەتىك مەڭگەرگەندەرىن كورسەتىپ، قازاق حالقىنىڭ تاريحىنا، مادەنيەتىنە، سالت- داستۇرلەرىنە، قازاق جازۋشىلارىنىڭ، عالىمدارىنىڭ، ايگىلى تۇلعالارىنىڭ شىعارماشىلىعىنا قىزىعۋشىلىق تانىتاتىنىن دالەلدەدى.
