دەنيس تەن گەنەرال اتاسى مەن ناعىز جانكۇيەرى تۋرالى سىرىن ايتتى

الماتى. قازاقپارات - قازاقستاندىق مانەرلەپ سىرعاناۋشى دەنيس تەن ۋنيۆەرسياداعى جۇلدەسىن مارقۇم اجەسىنىڭ قۇرمەتىنە ارنادى، دەپ جازادى «قازاقپارات» ءتىلشىسى.

بۇعان دەيىن حابارلانعانداي، دەنيس تەن ۋنيۆەرسيادانىڭ التىن مەدالىن جەڭىپ العان. «ءوز ەلىمدە مۇز ايدىنىنا شىقتىم. بۇل تۋرنيردى وتانداستارىم كوپ كۇتكەندىكتەن، مەن قاتتى تولقىدىم. مۇنى بارلىعى كۇتتى، ءبىراق اجەم ەرەكشە كۇتكەن ەدى. اجەم وسىدان بىرنەشە اي بۇرىن دۇنيەدەن ءوتىپ كەتتى. ول مەنىڭ ويىمنان كەتپەيدى. اجەم مەنىڭ ناعىز جانكۇيەرىم ەدى... مەن بارلىق سايىسىمدى سول كىسىگە ارنايمىن. بۇگىن دە سىرعاناپ جۇرگەنىمدە اجەمدى ويلادىم، ونەرىمدى وعان ارنادىم»، - دەدى سپورتشى.

سونىمەن قاتار، دەنيس تەن ءوزىنىڭ ارعى اتاسى تۋرالى دا سىر ايتتى. ول اتاسىنىڭ وڭتۇستىك كورەيادا گەنەرال بولعانىن، كورەي ەلىنە بارعان سايىن اتاسىنىڭ قابىرىنەن تاس الىپ كەتىپ وتىراتىن ادەتى بارىن جەتكىزدى. ونىڭ ايتۋىنشا، اتاسىنىڭ زيراتىنان الىنعان سول تاستار وعان بويتۇمارداي ەكەن. دەنيس بولاشاق جوسپارىمەن دە ءبولىستى. ونىڭ ايتۋىنشا، سپورتشى ۋنيۆەرسيادادان كەيىن ءۇش تۋرنيرگە قاتىسپاق.

«مەنىڭ ۇلكەن ماقساتىم بار. مەن كوماندا قۇردىم. قازىر مەن ءۇشىن ماڭىزدىسى دامۋدى كورسەتۋ. مەندە جاراقات كوپ بولعاندىقتان، وزگە بۇلشىق ەتتەرىمە كۇش سالىپ كورمەكپىن. ەگەر تاعى دا مەدالدار الا السام، ءومىرىمنىڭ بوس كەتپەگەنى»، - دەيدى دەنيس تەن.

اۆتور: الماس مۇقاش ۇلى