يندۋستريالاندىرۋ اياسىندا اشىلعان كەيبىر زاۋىتتاردى جاۋىپ تاستاعان دۇرىس شىعار - ساعىنتايەۆ

استانا. قازاقپارات - ۇكىمەت باسشىسى باقىتجان ساعىنتايەۆتىڭ ويىنشا، بۇگىندە يندۋستريالاندىرۋ باعدارلاماسى اياسىندا تولىققاندى جۇمىس ىستەمەي جاتقان، ءيا بولماسا توقتاپ تۇرعان كاسىپورىنداردىڭ جاعدايىن زەردەلەپ شىققانان كەيىن كەيبىرەۋلەرىن مۇلدەم جاۋىپ تاستاعان دۇرىس بولادى،

دەپ حابارلايدى قازاقپارات ءتىلشىسى.

«باسەكەگە قابىلەتتى جانە ەكسپورتقا شىعا الاتىن جوبالار عانا مەملەكەتتىك قولداۋعا يە بولۋى ءتيىس. نەگىزى، اناۋ 72 كاسىپورىننىڭ كارتاسىن الىپ، ونى جان- جاقتى زەردەلەپ شىققان ءجون. ءاربىر جوبانى بولەك- بولەك قاراپ، ناقتى قانداي كومەكتىڭ كەرەك ەكەنىن انىقتاپ الۋ قاجەت. بالكىم، كەيبىر كاسىپورىنداردى مۇلدەم جاۋىپ تاستاعان ءتيىمدى بولار. ولارعا اقشا قۇيىپ، قايتا ىسكە قوسامىز دەگەنشە مۇلدەم جاۋىپ تاستايىق. ونداي جاعدايعا نەگە تاپ بولعانىن انىقتاعان ءجون»، - دەپ اتاپ كورسەتتى ساعىنتايەۆ. سونداي- اق پرەمەر- مينيستر جاڭا جوبالاردى ىرىكتەۋدىڭ ەرەجەلەرىن قايتا قاراپ شىعۋدى تاپسىردى.

 ايتا كەتەيىك، ۇكىمەتتىڭ كەشەگى كەڭەيتىلگەن القا ماجىلىسىندە مەملەكەت باسشىسى بۇعان دەيىن ەلىمىزدە ىسكە قوسىلعان جالپى سوماسى 150 ميلليارد تەڭگەنى قۇرايتىن 72 جوبانىڭ تولىق جۇكتەمەدە جۇمىس ىستەمەي تۇرعاندىعىن سىنادى.

«بىزدە ءاربىر كاسىپورىنمەن جەكە- جەكە جۇمىس جۇرگىزىلە مە؟ ارقايسىمەن، وبلىستاردا. نەعىپ تۇر ولار؟ قىرىمبەك، اقتوبەدە سالىناتىن اينەك زاۋىتىن سەن سۇراعاننان كەيىن سىردىڭ جانىنداعى ەلدىڭ جاعدايى ناشارلاۋ، جۇمىس ورنى بولسىن دەپ انا جاقتان الىپ ساعان بەردىك. سەندەر قالاي سالىپ جاتىرسىڭدار؟»، - دەپ سۇرادى ەلباسى  قىزىلوردا وبلىسىنىڭ اكىمى كوشەربايەۆتان. «جاقىندا اسقار ۇزاقباي ۇلى (پرەمەر- ءمينيستردىڭ ورىنباسارى مامين) بولدى. امانشىلىق بولسا، قازاندا قۇرىلىسى بىتىرەمىز دەپ جوسپارلاۋدامىز»، - دەدى وبلىس اكىمى.

كەلەسى كەزەكتە پرەزيدەنت قوستاناي وبلىسىندا قۇنى 3,3 ميلليارد تەڭگەنى قۇرايتىن قۇس ەتىن شىعاراتىن كاسىپورىن دا توقتاپ تۇرعانىن ايتتى.

«2013 -جىلدان بەرى سوت بولىپ جاتىر. جاقىندا عانا بارلىعى اياقتالدى. قۇرىلتايشىلار 3 جىلداي ءبىر- بىرىمەن سوتتاستى. سول سەبەپتى توقتاپ قالدى. جاقىندا عانا سوت شەشىمى كۇشىنە ەندى. قازاگرومەن شەشىم قابىلداۋدا»، - دەدى بۇل ماسەلەگە قاتىستى ءسوز العان قوستاناي وبلىسىنىڭ اكىمى ارحيمەد مۇحامبەتوۆ. مەملەكەت باسشىسى قاراعاندى وبلىسىندا قۇنى 1 ميلليارد تەڭگەنى قۇرايتىن بولات رادياتورلار شىعاراتىن زاۋىتتىڭ دا توقتاپ تۇرعانىن اتاپ ءوتتى.

«بۇل ماسەلەنى بىلەمىز. قۇرىلتايشىسى سوتتالعان سوڭ تۇرىپ قالدى. ونى قازىر ارى قاراي جۇرگىزەمىز»، - دەدى ءوڭىر باسشىسى نۇرمۇحامبەت ابدىبەكوۆ.

«ەكەۋىڭدە قۇرىلتايشى دەپ وتىرسىڭدار. مىنا جەردە جوعارعى سوت تا، باس پروكۋرور دا وتىر. كىم كەرەك، ساعان؟ ولاردى شاقىرىپ الىپ نە شەشىڭدەر، نە كەتىڭدەر دەپ ايتاتىن ادام جوق پا؟ سەندەردى جەرگىلىكتى جەرگە قوجا بولسىن، ەلدىڭ شارۋاسىن شەشسىن دەپ تاعايىندادىم. نە ىستەسە ونى ىستەسىن دەپ كوزدەرىڭدى باقىرايتىپ قاراپ وتىراسىڭدار ما؟ ۇكىمەتكە كەلىڭدەر، ءبارىن شاقىرىپ الىڭدار، جۇمىس ىستەتكىزىڭدەر. ىستەيسىڭدەر، بولماسا، باسقاعا بەرەمىز دەۋ كەرەك»، - دەپ ەسكەرتتى پرەزيدەنت ءوڭىر باسشىلارىنا.

اۆتور: ارمان اسقاروۆ