حالىقتى دارىمەن قامدايتىن «س ك- فارماتسيا» باسشىسى قىزمەتتەن كەتتى - مينيستر ءبىرتانوۆ

استانا. قازاقپارات - ۇكىمەتتىڭ بۇگىنگى وتىرىسىندا پرەمەر- مينيستر باقىتجان ساعىنتايەۆ «س ك- فارماتسيا» كومپانياسىنىڭ باسشىلىعىنا قاتىستى پرەزيدەنتتىڭ تاپسىرماسى قالاي ورىندالعانىن سۇرادى،

 دەپ حابارلايدى قازاقپارات ءتىلشىسى.

 (فارماتسيا- دەنساۋلىق ساقتاۋ ءىسىنىڭ حالىققا دارىمەن كومەك كورسەتۋدى ىسكە اسىراتىن ءبىر سالاسى. فارماتسيانىڭ تەوريالىق نەگىزىنە دارىلىك زاتتاردى انىقتاۋ، ىزدەۋ، ولاردى زەرتتەۋ، دايىنداۋ، قالىپتاۋ جانە شىعارۋ، سۇرىپتاۋ، ستاندارتتاۋ، ساقتاۋ، تاراتۋ جانە فارماتسيالىق قىزمەتتى ۇيىمداستىرۋ جاتادى.)

«ايتپاقشى، ءسىز (دەنساۋلىق ساقتاۋ ءمينيسترى ەلجان ءبىرتانوۆ - اۆت. ) كادر ماسەلەسى بويىنشا پرەزيدەنتتىڭ بەرگەن تاپسىرماسىن ورىندادىڭىز با؟»، - دەپ سۇرادى ساعىنتايەۆ. «ءيا، شەشىم قابىلداندى. ەندى، پروتسەدۋرالىق جۇمىستار قالدى. «س ك- فارماتسيانىڭ» ءبىرىنشى باسشىسى جۇمىستان كەتۋ تۋرالى ارىز بەردى. قازىرگى كەزدە ول قىزمەتتەن شەتتەتىلدى»، - دەدى دەنساۋلىق ساقتاۋ ءمينيسترى.

 ايتا كەتەيىك، كەشە ۇكىمەتتىڭ كەڭەيتىلگەن ماجىلىسىندە قازاقستان پرەزيدەنتى نۇرسۇلتان نازاربايەۆ «س ك- فارماتسيا» كومپانياسىنىڭ قىزمەتىن سىنعا العان بولاتىن. «فارماتسيا مەملەكەت اقشا بەرىپ، سول اقشانى ساتىپ الۋلارعا جۇمسايتىن ءبىرىڭعاي ديستريبيۋتەر. بۇل مافياعا اينالعان. ولار فارماتسيەۆتيكالىق فابريكا سالۋعا دا مۇمكىنشىلىك بەرمەيدى. قازىر ءوزىمىزدى قانشا دايىن ءدارى- دارمەكپەن قامتاماسىز ەتەمىز؟ 50 پايىز بولسىن دەپ تاپسىرما بەرىپ ەدىم عوي»، - دەپ سۇرادى پرەزيدەنت دەنساۋلىق ساقتاۋ مينيسترىنەن.

 «جالپى، مەملەكەت تارابىنان بولىنگەن اقشادان 30 پايىزى ءوزىمىزدىڭ ونىمگە جۇمسالادى. جىل سايىن كوبەيىپ كەلەدى. ءبىراق، 30 پايىزدان اسپادىق»، - دەدى مينيستر. ال قازىر فارم فابريكالار سالامىز دەگەن بيزنەسمەندەر كەلەدى، جىبەرمەيدى. جەر بەرمەيمىز، تاپسىرىس بەرمەيمىز، دارىلەرىڭدى ساتىپ المايمىز دەپ ايتادى. سەبەبى انا جاقتان، اۆستراليادان، امەريكادان كەلىسىمشارت جاساپ قويدىق. مىنە وسى كەلىسىمشارتتىڭ ارتىندا بىرەۋلەر تۇر. سودان پايدا الىپ وتىر. وتاندىق فارماتسيەۆتيكا سالاسىن دامىتقىسى كەلمەيدى. ءبىز وسىنى وزگەرتە الامىز با، جوق پا؟ قازىر «فارماتسيادا» وتىرعانداردىڭ ءبارىن قۋىپ جىبەر. جاڭا ادامدار قويىپ، اقشانىڭ قايدا جۇمسالاتىن شەشىڭدەر. جاڭا ادامدار الىڭدار. مەن مۇنى بىرنەشە جىل بويى ايتىپ كەلەمىن. ەشتەڭە شىقپاي جاتىر. ورنىنان قوزعاۋ مۇمكىن ەمەس، بىرەۋلەر وتىر. ولاردى كىم قولدايدى؟ ءبىرتانوۆ، بۇل ءۇشىن سەن جاۋاپ بەرەسىڭ»، - دەگەن ەدى نۇرسۇلتان نازاربايەۆ.

اۆتور: ارمان اسقاروۆ