پۋتين مەن لۋكاشەنكونىڭ كەزدەسەتىن كۇنى ازىرگە انىقتالمادى

استانا. قازاقپارات - رەسەي پرەزيدەنتى ۆلاديمير پۋتين مەن بەلارۋس پرەزيدەنتى الەكساندر لۋكاشەنكو اقپاننىڭ العاشقى جارتىسىندا كەزدەسۋى مۇمكىن.

 رەسەي پرەزيدەنتىنىڭ باسپا ءسوز حاتشىسى دميتري پەسكوۆ رەسەيلىك «يزۆەستيا» گازەتىنە كەزدەسۋ وداقتاس ەلدەر  سامميتى اياسىندا جوسپارلانىپ وتىرعانىن، ال ونىڭ كۇن تارتىبىندە ەكى ەلدىڭ ەنەرگەتيكالىق ىنتىماقتاستىق ماسەلەلەرىن تالقىلاۋ دا بارىن ايتتى.

ماسكەۋ كەزدەسۋدى 9 - اقپاندا وتكىزۋدى ۇسىنعان، ءبىراق مينسك ازىرگە بۇل مەرزىمدى قۋاتتاماعان.

وتكەن جىلى گاز تاسىمالىنا بايلانىستى رەسەي مەن بەلارۋس اراسىندا كيكىلجىڭ تۋىنداعان. كومىرسۋتەگى شيكىزاتى باعاسىنىڭ ارزانداۋىنا بايلانىستى مينسك رەسەيدەن جەتكىزىلەتىن گاز باعاسىن تومەندەتۋدى تالاپ ەتىپ، ءبىر جاقتى تۇردە از تولەي باستاعان. قازىر مينسكىنىڭ گاز ءۇشىن تولەيتىن قارىزى 550 ميلليون دوللاردى قۇرايدى. بۇل ماسەلەگە قاتىستى كەلىسسوز ءساتسىز اياقتالعان. بۇدان وزگە، قاڭتاردىڭ باسىندا رەسەيدىڭ بەلارۋسكە مۇناي تاسىمالداۋدى ازايتۋ نيەتى بارى بەلگىلى بولعان.

بۇگىن Regnum اگەنتتىگى ءوزىنىڭ دەرەككوزىنە سىلتەمە جاساپ، مينسكىنىڭ ەۋرازيا ەكونوميكالىق وداعىنان (ەاەو) جانە ۇجىمدىق قاۋىپسىزدىك شارتى ۇيىمىنان (ۇ ق ش ۇ) شىعۋعا دايىندالىپ جاتقانىن جانە رەسەي مەن بەلارۋس مەملەكەتتەرىنىڭ وداعىنان دا شىعۋى مۇمكىن ەكەنىن حابارلادى. دەرەككوزىنىڭ اقپاراتىنا قاراعاندا، ماسكەۋ مينسكىنىڭ جوسپارىنا تۇسىنىستىكپەن قارايدى جانە قاتقىل مالىمدەمە جاسامايدى.

1 - اقپاندا رەسەي فەدەرالدىق قاۋىپسىزدىك قىزمەتىنىڭ (ف س ب) باسشىسى الەكساندر بورتنيكوۆ رەسەيدىڭ بەلارۋسپەن شەكاراسىنا شەكارا بەلگىلەرىن ورناتۋعا بۇيرىق بەرگەن.

9 - قاڭتاردا بەلارۋس 80 مەملەكەتتىڭ، ونىڭ ىشىندە ەۋروپا وداعى ەلدەرى مەن ا ق ش ازاماتتارىنا ەلدە بەس كۇنگە دەيىن ۆيزاسىز ءجۇرىپ- تۇرۋ رەجيمىن ەنگىزگەن.