لۋكاشەنكو: رەسەي شەكارا كەلىسىمىن سىزىپ تاستادى
بۇگىن مينسكىدە وتكەن باسپا ءسوز كونفەرەنسياسىندا لۋكاشەنكو جەرگىلىكتى جانە شەتەلدىك جۋرناليستەر الدىندا رەسەيدىڭ بەلارۋسپەن جاساسقان شەكارا كەلىسىمىن «قالامساپپەن ادەمىلەپ تۇرىپ سىزىپ تاستاعانىن» مالىمدەدى.
لۋكاشەنكو بۇل ءسوزى ارقىلى مينسك 9 - قاڭتاردا 80 مەملەكەت، ونىڭ ىشىندە ەۋروپا وداعى وداعىنىڭ ەلدەرى مەن ا ق ش ازاماتتارىنا ەلگە بەس كۇنگە دەيىن ۆيزاسىز كەلىپ- كەتۋىنە رۇقسات بەرگەن رەسەيدىڭ بەلارۋسپەن شەكاراسىنا باقىلاۋ ورناتۋعا كىرىسكەنىن مەڭزەدى.
لۋكاشەنكو رەسەيدى شاعىن عانا بەلارۋسكە ونىڭ كومىرسۋتەگى شيكىزاتىن تاسىمالدايتىن قۇبىرلارىنا باقىلاۋ ورناتۋ ارقىلى ىقپال ەتكىسى كەلەدى جانە مۇناي مەن گازىن بيلىگىن جۇرگىزۋگە پايدالانعىسى كەلەدى دەدى.
«رەسەي مۇناي جانە گاز قۇبىرلارىن ءجيى ۋىسىندا ۇستاپ كەلگەن. قازىر دە سولاي بولىپ وتىر» دەدى لۋكاشەنكو. بەلارۋس باسشىسى «وسىنداي كيكىلجىڭدەردەن سوڭ ولار ۇنەمى ماعان «ءبىز ازداپ قاتتى كەلىپ قالىپپىز» دەيدى. ءبىراق ومىرلىك ماڭىزى بار نارسەگە قالاي ۇستەمدىك جۇرگىزەدى؟ نەگە ءبىزدى جانالقىمنان الادى؟» دەدى.
الەكساندر لۋكاشەنكو «تاۋەلسىزدىكتىڭ مۇنايمەن ولشەنبەيتىنىن» جانە ۇزاق ۋاقىت بويى رەسەيدىڭ سۋبسيديالانعان كومىرسۋتەگى شيكىزاتىنا تاۋەلدى بولعان بەلارۋستىڭ قاجەت بولسا مۇناي مەن گازدىڭ باسقا دا كوزدەرىن تاباتىنىن ايتتى.
«ازاتتىق» جاڭالىقتارى
