ا ق ش ەلشىسى: قىرىم قايتارىلمايىنشا سانكسيا جويىلمايدى
استانا. قازاقپارات - ا ق ش- تىڭ ب ۇ ۇ- داعى جاڭا ەلشىسى نيككي حەيلي رەسەيدىڭ ۋكراينانىڭ شىعىسىنداعى ءىس- قيمىلىن «قاتاڭ ايىپتايتىنىن» ءبىلدىردى. ەلشى سونىمەن قاتار رەسەيدىڭ ۋكرايناعا قاتىستى ساياساتىنا بايلانىستى ەنگىزىلگەن سانكسيالار قىرىم ۋكرايناعا قايتارىلمايىنشا الىنبايتىنىن ەسكەرتتى.
«قىرىم ۋكراينانىڭ بولشەگى سانالادى. ءبىزدىڭ قىرىممەن بايلانىستى سالعان سانكسيالارىمىز رەسەي تۇبەكتى باسقارۋدى ۋكرايناعا قايتارمايىنشا كۇشىندە قالا بەرەدى» دەدى حەيلي ب ۇ ۇ قاۋىپسىزدىك كەڭەسىندە جاساعان مالىمدەمەسىندە.
«ارينە، رەسەيدىڭ باسقىنشىلىق ساياساتىنان ۋكراينانىڭ شىعىسى عانا جاپا شەگىپ وتىرعان جوق. ا ق ش مۇنى ايىپتايدى جانە رەسەيدىڭ قىرىمدى وككۋپاتسيالاۋىن دەرەۋ توقتاتۋعا شاقىرادى» دەدى حەيلي.
ا ق ش- تىڭ جاڭا ەلشىسى «ءبىز رەسەيمەن بايلانىسىمىزدى جاقسارتقىمىز كەلەدى، ءبىراق ۋكراينانىڭ شىعىسىنداعى اۋىر جاعداي رەسەيدىڭ ارەكەتىن ايقىن جانە قاتال تۇردە ايىپتاۋدى تالاپ ەتىپ وتىر» دەدى.
رەسەي قىرىمعا 2014 -جىلى ناۋرىزدا تۇبەككە اسكەر كىرگىزىپ، رەفەرەندۋم وتكىزگەن سوڭ باقىلاۋ ورناتقان. رەفەرەندۋمدى ۋكراينا مەن 99 مەملەكەت زاڭسىز دەپ سىناعان.
«ازاتتىق» جاڭالىقتارى
