لۋكاشەنكو: مينسك قىسىمعا قاراماستان حاوس پەن ارانداتۋدان اۋلاق بولادى

استانا. قازاقپارات - بەلارۋس پرەزيدەنتى الەكساندر لۋكاشەنكو ءوز ەلى «بەي- بەرەكەتسىزدىك پەن كيكىلجىڭ تۋدىرۋ» ارەكەتتەرىنە قارسى تۇرىپ، كورشىلەرىمەن قارىم- قاتىناسىن شيەلەنىستىرىپ الۋدان ساقتانۋى ءتيىس ەكەنىن مالىمدەدى.

 لۋكاشەنكو بۇل تۋرالى بۇگىن مينسكىدە وتكەن باسپا ءسوز كونفەرەنسياسىندا ايتتى.

«بەلارۋستە بەي- بەرەكەتسىزدىك ورناتىپ، كيكىلجىڭ تۋدىرعىسى كەلەتىن كۇشتەر بار. ءبىز كۇردەلى گەوساياسي اۋاندا بەيبىتشىلىك پەن تۇراقتىلىقتى ساقتاپ قالا الدىق» دەدى لۋكاشەنكو.

لۋكاشەنكو 10 ميلليون حالقى بار، تەڭىزگە شىعا المايتىن بەلارۋس «ەۋرازيا قۇرلىعىنىڭ ورتاسىندا» ورنالاسقانىن ايتىپ، وزىنە كورشى تاڭداماعانىن ايتتى. «ءبىز بارلىق كورشىمىزبەن دوس بولۋعا ءتيىسپىز. ۋكراينا دا، رەسەي دە، پولشا دا بىزگە بوتەن ەمەس. ولار ءبىزدىڭ كورشىمىز جانە ءبىزدى ولارمەن قۇداي كورشى قىلعان» دەدى بەلارۋس باسشىسى.

رەسەيدىڭ 2014 -جىلى ۋكراينادان قىرىم تۇبەگىن تارتىپ الىپ، ۋكراينا شىعىسىنداعى سەپاراتيستەرگە قولداۋ كورسەتۋى ايماق ەلدەرىنىڭ ماسكەۋدىڭ پيعىلىنا الاڭداۋشىلىعىن تۋدىردى.

«ازاتتىق» جاڭالىقتارى