02:45, 04 - اقپان 2017 | GMT +5
يراندا سوت ايەلدىڭ ءبىر كوزىن سوقىر ەتۋگە ۇكىم شىعاردى
استانا. قازاقپارات - يراندا سوت ۇكىمىمەن ايەلدىڭ ءبىر كوزىن سوقىر ەتۋگە جازا تاعايىندالدى. ول ەكى جىل بۇرىن جابىرلەنۋشىنىڭ كوزىنە قىشقىل شاشىپ جىبەرىپ، كوز جانارىنان ايىرعان، دەپ حابارلايدى Reuters.
حابارلانعانداي، سوتتالۋشى بۇنداي ارەكەتتى ەكى جىل بۇرىن ماحشەحر قالاسىندا جاساعان، سوتتالۋشى مەن جابىرلەنۋشىنىڭ ەسىمدەرى اتالماعان.
جوعارى ينستانتسيا سوتى ايەلدىڭ ءبىر كوزىن سوقىر ەتىپ، وتەماقى تولەۋگە جانە جەتى جىل باس بوستاندىعىنان ايىرۋعا ۇكىم شىعارعان. ۇكىمدى ورىنداۋ مەرزىمىن سوت ءالى انىقتاماعان.
اتاپ وتىلگەندەي، يران زاڭىنا سايكەس، وسىنداي تۇرعىداعى جازا سوتتالۋشىنىڭ تۋىستارىنىڭ ءوتىنىشى بويىنشا، باسقا شارامەن الماستىرىلۋى مۇمكىن.
اۆتور: اقبوپە ءابدراسۋل
