پرەزيدەنت تاسماعامبەتوۆتىڭ قىزمەتىنىڭ اۋىسۋىن ءتۇسىندىردى
مەملەكەت باسشىسى الدىمەن ەلدە سوڭعى ۋاقىتتارى ورىن العان اۋىس- تۇيىستەرگە توقتالدى.
«كەيبىر كادرلىق اۋىس- تۇيىستەر ورىن الدى. «بايتەرەك» قورىندا زاڭ بۇزۋشىلىق پەن قارجىلىق ءتارتىپ بويىنشا تەرگەۋ جۇرگىزىلىپ جاتقاندىقتان، ونىڭ بۇرىنعى باسشىلىعى مەن ۇلتتىق ەكونوميكا ءمينيسترى قىزمەتتەرىنەن بوساتىلدى. سوعان بايلانىستى، مينيسترلىك باسشىلىعىنا تيمۋر سۇلەيمەنوۆ تاعايىندالدى، وتە ءبىلىمدى، دايىندىعى مىقتى، شەتەلدە جوعارى ءبىلىم العان، اعىلشىن ءتىلىن يگەرگەن. تيمۋر سۇلەيمەنوۆ ماسكەۋدە ەۋرازيالىق ەكونوميكالىق وداقتا قىزمەت ەتتى. مەنىڭشە، بۇل تاڭداۋ جامان تاڭداۋ ەمەس. دەنساۋلىق ساقتاۋ مينيسترلىگىنىڭ الدىندا ۇلكەن مىندەتتەر تۇرعاندىقتان، الەۋمەتتىك دامۋ مينيسترلىگى مەن دەنساۋلىق ساقتاۋ مينيسترلىكتەرىن ءبولۋدى شەشتىك. مينيستر بولىپ ەلجان ءبىرتانوۆ تاعايىندالدى. ول دا جاس، دايىندالعان، مىقتى مەكتەپتەن وتكەن ازامات، دەنساۋلىق ساقتاۋ مينيسترلەرىنىڭ ورىنباسارلىعىنا ەكى مارتە تاعايىندالعان. مەديتسينا مامانى جانە مەنەدجەر رەتىندە مەديتسينالىق ساقتاندىرۋ قورىن قۇرۋ ءىسىن جاقسى قولعا الىپ، حالىققا ءتۇسىندىرۋ جۇمىستارىن ويداعىداي وتكىزەدى دەگەن سەنىمدەمىن. بۇل ءار ازاماتقا ءتيىمدى دەپ سانايمىن. ول مينيسترلىكتە ءتارتىپ ورناتادى دەگەن ويدامىن»، - دەدى ەلباسى.
سونىمەن قاتار پرەزيدەنت مارات ءتاجيننىڭ استاناعا ورالۋىنا، تاسماعامبەتوۆتىڭ رەسەيدەگى قازاقستان ەلشىلىگىنە اۋىسۋىنا قاتىستى پىكىر ءبىلدىردى.
«تاعى ءبىر ۇلكەن اۋىس- ءتۇيىس ورىن الدى، رەسەيدەگى قازاقستان ەلشىسى قىزمەتىنەن بوساتىلدى. مارات ءتاجين پرەزيدەنت اپپاراتىنا ءوتتى. وسىعان وراي، مەنىمەن بىرگە كوپ جىلدار بويى قىزمەت ەتكەن يمانعالي تاسماعامبەتوۆتى قازاقستان ەلشىسى ەتىپ تاعايىندادىم. ول ءوزى ءدال وسى قىزمەتكە، ناق وسى رەسەيدەگى ەلشىلىكتى باسقارۋعا سۇراندى. مەنىڭشە، بۇل جاقسى شەشىم، سەبەبى ماسكەۋ ءبىزدىڭ ەڭ باستى سەرىكتەسىمىز، جاقىن كورشىمىز بەن وداقتاسىمىز. ول جەردە بەدەلدى، قازاقستانداعى جانە رەسەيدەگى جاعدايدى بىلەتىن ادام وتىرۋى ءتيىس. مەن وسىنىڭ بارلىعى ءبىزدىڭ ءىسىمىزدىڭ، ەلىمىزدىڭ يگىلىگىنە جارايدى دەپ ويلايمىن»، - دەدى مەملەكەت باسشىسى.
ايتا كەتەيىك، پرەزيدەنتتىڭ جارلىعىمەن يمانعالي نۇرعالي ۇلى تاسماعامبەتوۆ باسقا جۇمىسقا اۋىسۋىنا بايلانىستى قازاقستان رەسپۋبليكاسى پرەمەر- ءمينيسترىنىڭ ورىنباسارى قىزمەتىنەن بوساتىلدى. مەملەكەت باسشىسى ۇكىمەتتىڭ كەڭەيتىلگەن وتىرىسىنان سوڭ يمانعالي تاسماعامبەتوۆتى قازاقستان رەسپۋبليكاسىنىڭ رەسەي فەدەراتسياسىنىنداعى توتەنشە جانە وكىلەتتى ەلشىسى قىزمەتىنە تاعايىنداۋ جونىندە شەشىم قابىلداعاندىعىن جاريا ەتتى.
اۆتور: جاسۇلان جولدىبايەۆ
