ق ر پرەزيدەنتى: اعىلشىن ءتىلىنىڭ كەرەگى نە دەيتىندەر - قازاققا قارسى جۇمىس ىستەيتىن ادامدار

استانا. قازاقپارات - اعىلشىن ءتىلىنىڭ كەرەگى نە دەيتىندەر - قازاققا قارسى جۇمىس ىستەيتىن ادامدار. بۇل تۋرالى بۇگىن ۇكىمەتتىڭ كەڭەيتىلگەن ماجىلىسىندە قازاقستان پرەزيدەنتى نۇرسۇلتان نازاربايەۆ ايتتى،

 دەپ حابارلايدى قازاقپارات.

 ق ر پرەزيدەنتى دامىعان ەلدەردە قابىلدانعان 12 جىلدىق ءبىلىم بەرۋ جۇيەسىنە كوشۋدىڭ، ءۇش تىلدە وقىتۋدىڭ پايداسىن جانە ۇلتتىق ءبىرىڭعاي تەستىلەۋدىڭ پايداسىن حالىققا ناقتى ءتۇسىندىرۋ قاجەتتىگىن باسا ايتتى. بۇل رەتتە اقپارات جانە كوممۋنيكاتسيالار ءمينيسترى داۋرەن ابايەۆقا ءتۇسىندىرۋ جۇمىستارىن قولعا الۋدى تاپسىردى.

 «مەن قابىلدانعان بۇل باعىتتاردىڭ بارلىعى دا دۇرىس دەپ سانايمىن. ءبىراق، ونى دۇرىستاپ ءتۇسىندىرىپ، جۇزەگە اسىرۋ قاجەت. مۇنى بارلىعى دا ءتۇسىنۋى كەرەك. قاجەتتىلىگىن كوپ ايتقان بولاتىنبىز. ءاي، ونىڭ، اعىلشىن ءتىلىنىڭ كەرەگى نە دەيتىن ادامدار - قازاققا قارسى جۇمىس ىستەيتىن ادامدار، ەرتەڭىمىز بولماسىن دەگەن ادامدار. ءبىز جالعىز ەمەسپىز. 1,5 ميلليارد استام حالقى بار ءۇندىستان تاۋەلسىزدىك العان كەزدە حيندي تىلىنە كوشكەن بولاتىن. 4 جىلدان كەيىن قايتادان اعىلشىن تىلىنە ورالدى. مالايزيا دا سويتكەن بولاتىن. ول دا قايتىپ كەلدى. سەبەبى، دۇنيەدەگى بارلىق عىلىم، جاڭالىق اعىلشىن تىلىندە بولىپ جاتىر. قايتەمىز ەندى. ءبىزدىڭ شارۋامىز ەمەس، ول. مەملەكەتتىڭ، دۇنيەنىڭ شارۋاسى. جاستارىمىز، بالالارىمىز اعىلشىن ءتىلىن بىلمەسە، قازاقستاننىڭ بولاشاعىنا كەدەرگى بولادى. ءتۇسىندىرۋ كەرەك»، - دەدى نۇرسۇلتان نازاربايەۆ.

سونىمەن قاتار ەلباسى ءبىلىم سالاسىنداعى رەفورمالاردى قوعاممەن جان- جاقتى تالقىلاپ، ءتۇسىندىرۋ جۇمىستارىن جۇرگىزۋ كەرەكتىگىن ەسكەرتتى.

اۆتور: مارلان جيەمباي