نازاربايەۆ ۇكىمەت مۇشەلەرىنە: قورىقساڭدار نەسىنە مينيستر بولاسىڭدار
دەپ حابارلايدى قازاقپارات.
«ءاربىر باسشى جاۋاپكەرشىلىكتى سىرعىتپاي ءوز موينىنا الۋى كەرەك. ءبىز بۇل تۋرالى انا جىلى ۇكىمەتتى قايتا ۇيىمداستىرعاندا ايتقانبىز. ۆيتسە- پرەمەرلەر، مينيسترلەر سانىن قىسقارتقاندا ايتتىق. ءار مينيستر ءوزى بۇيرىق شىعارادى، ءوزى سونى ورىندايدى، ءوزى جاۋاپ بەرەدى. بيۋدجەتكە قازىردەن باستاپ كىرىسەسىڭدەر، ءار مينيسترلىككە، ءار وڭىرگە اقشا بولىنەدى. سونى الامىز دەپ تىرمىسىپ قانشاما جۇمىس ىستەپ، دالەلدەدىڭدەر، الدىڭدار. ەندى سونىڭ ءبارىن الىپ ۇقساتىڭدار، جەتكىزىڭدەر. سودان كەيىن جاۋاپ بەرىڭدەر. ماسەلە سوندا. جاۋاپكەرشىلىك سونداي. ءبىراق، قاراپ وتىرساڭ، اباي ايتقانداي «باياعى جارتاس، ءبىر جارتاس». ءبارىبىر مينيسترلەر كەلەدى دە پرەمەر- مينيسترگە حات جازادى، ماعان جازادى. ۆيتسە- پرەمەرلەر بار، ولارعا حات جازادى. وزىنە جاۋاپكەرشىلىك المايدى. ونداي قورقاق بولساڭدار مۇنداي جۇمىسقا نەگە كەلەسىڭدەر؟ باسقا جەرگە بارىڭدار. قاعازعا قول قويمايتىن جۇمىستار بار، ورىنباسارلار بار. بيزنەسكە بارىڭدار»، - دەدى ەلباسى ۇكىمەت مۇشەلەرىنە قاراتا.
سونىمەن قاتار قازاقستان پرەزيدەنتى مينيسترلەر دەربەس شەشىم قابىلداۋدان جاسقانباۋى، جاۋاپكەرشىلىكتى مويىندارىنا الۋى قاجەتتىگىن باسا ايتتى.
«ەڭ ءبىرىنشى ماقسات مەملەكەتتىڭ ماقسات- مۇددەسىن باسشىلىققا الىپ، سونى ورىنداۋ. بۇل جونىندە، ءۇشىنشى جاڭعىرۋ جونىندەگى جولداۋدا اتالعان ماقساتتارعا قالاي قول جەتكىزۋ كەرەكتىگىن ايتىپ بەردىم»، - دەدى نۇرسۇلتان نازاربايەۆ.
اۆتور: مارلان جيەمباي
