ەلباسى قارجىنى ىسىراپ ەتكەن ۆەدومستۆولارعا شارا قولدانۋدى تاپسىردى

استانا. قازاقپارات - بۇگىن ۇكىمەتتىڭ كەڭەيتىلگەن ماجىلىسىندە ەلباسى نۇرسۇلتان نازاربايەۆ قارجى مينيسترلىگىنە مەملەكەت قارجىسىنىڭ ماقساتتى يگەرىلۋىن باقىلاۋدى كۇشەيتۋگە تاپسىرما بەردى،

  دەپ حابارلايدى قازاقپارات.

«بولىنگەن قارجىنى يگەرۋ دەگەن تەرمين بار. جىل بويىندا اقشانى الماي كەلەدى دە، جىلدىڭ اياعىندا قارجى مينيسترلىگى قارجى يگەرىلمەدى دەپ ايتپاسىن دەپ، قاراشا- جەلتوقساندا قارجىنى قايدا بولسا دا شاشادى. ياعني، تەك يگەرىلدى دەگەن قورىتىندى الۋ ءۇشىن وسىنداي قادامعا بارادى»، - دەدى مەملەكەت باسشىسى ق ر قارجى ءمينيسترى باقىت سۇلتانوۆقا قاراتىپ ايتقان سوزىندە.

وسى ورايدا پرەزيدەنت بۇل ماسەلە قاداعالاۋدا بولۋى ءتيىس ەكەنىن اتاپ ءوتتى.

«قارجى يگەرىلمەگەن جەردە بۇل اقشانى الىپ، يگەرۋگە قاۋقارلى باعىتتارعا جىبەرۋ كەرەك. بيۋدجەتتى قورعاعان كەزدە ءاربىر مينيسترلىك ءتۇرلى باعىتتارعا قارجى سۇراپ كەلەدى. دەمەك، وسىنىڭ بارلىعى نەگىزسىز تالاپتار بولعانىن بىلدىرەدى. ولاردى قارجىنى يگەرۋگە ماجبۇرلەۋدىڭ قاجەتى جوق. كەلەسى جىلى وسى ۆەدومستۆوعا ءتيىستى سومادا قارجىنى قىسقارتۋ كەرەك»، - دەپ تاپسىردى ن. نازاربايەۆ.

بۇل تۇرعىدا ەلباسى قارجى مينيسترىنە مەملەكەت قارجىسىن لايىقتى دەڭگەيدە قورعاۋدى جۇكتەدى.

اۆتور: رۋسلان عابباسوۆ