قازاقستان ءوزىنىڭ التىن- ۆاليۋتا قورىن «كەرتىپ جەۋدى» تىيدى
بۇل تۋرالى بۇگىن ق ر پرەزيدەنتى نۇرسۇلتان نازاربايەۆتىڭ توراعالىعىمەن ءوتىپ جاتقان ۇكىمەتتىڭ كەڭەيتىلگەن ماجىلىسىندە ۇلتتىق بانك ءتوراعاسى دانيار اقىشەۆ ءمالىم ەتتى، دەپ حابارلايدى قازاقپارات.
ونىڭ ايتۋىنشا، ەركىن ايىرباس باعامى رەجىمىنە كوشىپ، ەكونوميكا سۋبەكتىلەرى جاڭا جاعدايعا بەيىمدەلگەننەن كەيىن تەڭگەنىڭ ايىرباس باعامى تۇراقتانعان. ول وبەكتيۆتى فاكتورلارعا سايكەس كەلەدى جانە وندىرۋشىلەردىڭ باسەكەگە قابىلەتتىلىگىن قامتاماسىز ەتەدى.
«مۇنىڭ بارلىعى دا ۇلتتىق بانكتىڭ ۆاليۋتا نارىعىنا ارالاسۋىنسىز ءجۇرىپ جاتىر. ءبىز 2016 -جىلدىڭ قىركۇيەگىنەن ينتەرۆەنتسيا جۇرگىزبەيمىز. بۇل ساياسات التىن- ۆاليۋتا قورىن ساقتاۋعا مۇمكىندىك بەرەدى. وسى جىلدىڭ قاڭتار ايىنىڭ سوڭىندا ەلدىڭ ۇلتتىق قورىنىڭ ۆاليۋتالىق اكتيۆتەرىن قوسا العانداعى التىن- ۆاليۋتا رەزەرۆى 92 ميلليارد دوللارعا جەتىپ قالدى. بۇل 2015 -جىلدىڭ سوڭىنداعى دەڭگەيدەن جوعارى. ول كەزدە 91,3 ميلليارد دوللار بولعان ەدى. ءىس جۇزىندە بۇل ءوزىمىزدىڭ التىن- ۆاليۋتا قورىمىزدى «كەرتىپ جەۋدەن» تىيىلعانىمىزدى بىلدىرەدى»، - دەدى اقىشەۆ.
