جۇرەگى وڭ جاعىندا ورنالاسقان قازاق قىزى سوزدەردى كەرىسىنشە وقيدى

استانا. قازاقپارات - ماليكا تاكەنوۆا ەسىمدى بويجەتكەن بارلىق ءسوزدى كەرىسىنشە ايتىپ جۇرتتى تاڭعالدىردى.

بۇل تۋرالى قازاقستان ارناسىنىڭ «ايتۋعا وڭاي» باعدارلاماسىندا ايتىلدى.

ماليكا تاكەنوۆا مۇدىرمەستەن كەز كەلگەن ءسوزدى كەرىسىنشە ايتىپ بەرە الادى. مۇنداي قاسيەت ونىڭ بويىندا بالا كەزىنەن بار. عالىمداردىڭ مالىمەتتەرىنە سۇيەنسەك، بۇل 10 ميلليون ادامنىڭ تەك بىرەۋىندە عانا كەزدەسەدى. ونىڭ ىشكى اعزالارى دا وزگەشە ورنالاسقان. ياعني جۇرەگى وڭ، باۋىرى سول جاقتا. قان اينالىمى دا كەرى جۇرەدى.

«ءبىز ونىڭ دارىنىن ەرتە بايقادىق. ءبىراق اسا ءمان بەرمەدىك. ونىڭ ءتىپتى گيننەسستىڭ رەكوردتار كىتابىنا ەنگەنىن ەستىدىم. باسىندا ءبىراز ۋاقىتقا دەيىن سەنبەي ءجۇردىم. مۇنىڭ راسىمەن دە عالامات ەكەنىن قازىر سەزىنىپ وتىرمىن»، - دەيدى اتاسى يران تاسقارا. ماليكا ءدال قازىر كوكشەتاۋ قالاسىنداعى ج و و- لاردىڭ بىرىندە ينفورماتيكا ءپانى بويىنشا ماگيستراتۋرادا ءبىلىم الىپ ءجۇر. دارىندى قىز ۇنەمى ىزدەنىس ۇستىندە. كىتاپ وقىعاندى ۇناتادى.

«بويىمنان اسا ءبىر ەرەكشەلىك سەزىنبەيمىن. مەكتەپتە ءانۇران ايتقان كەزدە قولىمدى وڭ جاق ومىراۋىمنىڭ ۇستىنە قويامىن. مەن تۋعانىما ەكى كۇن بولعان كەزدە دارىگەرلەر ىشكى قۇرىلىسىمنىڭ كەرىسىنشە ورنالاسقانىن اناما ايتقان. ياعني بۇكىل ىشكى اعزام كەرىسىنشە ورنالاسقان. اپام مەن اتامنىڭ ارقاسىندا 4 جاسىمنان باستاپ جازۋدى ۇيرەندىم. باستاپقىدا سوزدەردى تەرىس وقۋ بارلىق ادامعا ءتان قاسيەت ەكەن دەپ ويلادىم. 11 جاسىمدا اناما تەرىس وقي الاتىنىمدى ايتتىم. ەكەۋىمىز مۇنىڭ سيرەك كەزدەسەتىن قاسيەت ەكەنىن سول كەزدە عانا بىلدىك. مۇنىڭ ەشقانداي دا دەنساۋلىققا زيانى جوق.

مەن سەكىلدى سوزدەردى كەرىسىنشە ايتاتىن ادامدار جەتەرلىك. ادەتتە قالاي ەستىسەم، سولاي ايتامىن. ياعني سوزدەردى كوز الدىما ەلەستەتپەي-اق ايتا بەرەمىن. ءبىراق وسى كۇنگە دەيىن ىشكى قۇرىلىسى وزگەشە ورنالاسقان ادامداردى كەزدەستىرمەدىم. ولاردى كورگىم كەلەدى. اتام 7 جاسىمدا دومبىرا الىپ بەرگەن بولاتىن. سودان بەرى ولەڭ ايتامىن. ارتىنشا مۋزىكا مەكتەبىنە بەردى. ارى قاراي مۋزىكالىق كوللەدجگە ءتۇستىم. ءبىتىرىپ ەندى ماماندىقتى وزگەرتتىم. ءقازىر باعدارلاماشى ماماندىعى بويىنشا ءبىلىم الىپ جاتىرمىن»، - دەيدى ماليكا.

بەيسەن قۇرانبەك باعدارلاما بارىسىندا ونى سىناپ كوردى. «ۇلتتىق ارنا»، «ايتۋعا وڭاي»، «قازاقستان»، «قازاقستاننىڭ تاۋەلسىزدىگىنە 25 جىل» سىندى سوزدەر مەن سويلەمدەردى كەرىسىنشە ايتقىزدى. مۇنىمەن قاتار، ماليكا بۇل ەرەكشەلىگىن بولاشاق جارىنان جاسىرمايتىنىن ايتىپ جاتىر. بىردەن ايتپاسا دا، ۋاقىت وتە كەلە ەسكەرتىپ قوياتىنىن جەتكىزدى.

 

دەرەككوزى: http://kaztv.kaztrk.kz/kz/projects/aituga-onai