ەستونيا پرەزيدەنتىنىڭ بانكتىك كارتوچكاسىن الاياقتار بۇزعان

استانا. قازاقپارات - ەستونيا پرەزيدەنتى كەرستي كاليۋلايد الاياقتاردىڭ قۇربانىنا اينالدى. الاياقتار ونىڭ قىزمەتتىك بانك كارتاسىن بۇزىپ، قارجىسىن يەمدەنگەن، دەپ حابارلادى بەيسەنبى كۇنى Postimees باسىلىمى.

«ەستونيا پرەزيدەنتىنىڭ كەڭسەسى 8 - قاڭتار كۇنى بەلگىسىز الاياقتىڭ ەستونيا پرەزيدەنتىنىڭ قىزمەتتىك بانك كارتاسىن بۇزىپ، Ross Stores امەريكالىق دۇكەنىندە 2,8 مىڭ ەۋرو كولەمىندە زاتتار ساتىپ العانى تۋرالى اقپارات العان»، - دەپ جازىلادى Postimees حابارلاماسىندا ERR ەستوندىق تەلەارناسىنىڭ Pealtnagija جۋرناليستىك زەرتتەۋ باعدارلاماسىنا سىلتەمە جاسالىپ.

باسىلىمنىڭ دەرەگىنە سۇيەنسەك، پرەزيدەنت كەڭسەسى جاعدايدى ۋاقىتىلى قولعا الىپ، كارتا يەسىنىڭ ەستونيادا بولعاندىعىن دالەلدەگەن. وپەراتسيا جويىلىپ، الىنعان قارجى قايتارىلدى، دەپ جازادى ria.ru.