اتىراۋ وبلىسىنىڭ پروكۋراتۋراسى ءوزىن-ءوزى ورتەگەن قىزمەتكەردىڭ ارەكەتىن ءتۇسىندىردى

اتىراۋ. قازاقپارات - اتىراۋ وبلىستىق پروكۋراتۋراسىنىڭ باسپا ءسوز قىزمەتى لەيلا سمادياروۆا ەسىمدى قىزمەتكەرىنىڭ ءوزىن ءوزى ورتەۋى تۋرالى ارەكەتىنە تۇسىنىكتەمە بەردى، دەپ حابارلايدى «قازاقپارات» ح ا ا ءتىلشىسى.

«2017 -جىلدىڭ 31 -قاڭتار كۇنى ساعات 11.30-دا وبلىستىق پروكۋراتۋرا عيماراتىنىڭ كولىك تۇراعىندا سمادياروۆا ل. ا. ءوزىن-ءوزى ورتەگەن ەدى. پروكۋراتۋرانىڭ كەزەكشىلىك ءبولىمى دەر كەزىندە العاشقى مەديتسينالىق كومەك كورسەتتى. قازىرگى تاڭدا ول ستاتسيونارلىق ەم قابىلداپ جاتىر. سمادياروۆاعا قاتىستى ق ر ق ك 366-بابىنىڭ (پارا الۋ) 3-تارماعى 1,3,4 -تارماقشاسى مەن 24-بابىنىڭ 3-تارماعى (پارا الۋعا يتەرمەلەۋ) بويىنشا قىلمىستىق ءىستى №2 -اتىراۋ قالالىق سوتى قاراپ جاتىر»، - دەپ ايتىلادى وبلىستىق پروكۋراتۋرا تاراتقان باسپا ءسوز بايانىندا. ەستەرىڭىزگە سالا كەتەيىك، لەيلا سمادياروۆا 2016 -جىلدىڭ تامىزىندا ءۇي قاماققا الىنعان بولاتىن. وعان 3 ميلليون تەڭگە كولەمىندە پارا الدى دەگەن ايىپ تاعىلعان. لەيلا سمادياروۆا وزىنە تاعىلعان ايىپپەن كەلىسپەگەن.