پاۆلودار وبلىسىندا بارلىق بالاباقشاعا قازاق تىلىندەگى تاربيە ەنگىزىلمەك

پاۆلودار. قازاقپارات - پاۆلودار وبلىسىنىڭ اكىمى بولات باقاۋوۆ وڭىردەگى بارلىق بالاباقشالارعا مەملەكەتتىك تىلدەگى تاربيەنى ەنگىزۋدى ۇسىندى، دەپ حابارلايدى «قازاقپارات» ح ا ا ءتىلشىسى.

مۇنداي يدەيانى ايماق باسشىسى قازاقستان پرەزيدەنتى نۇرسۇلتان نازاربايەۆتىڭ ەل حالقىنا جولداۋىنىڭ نەگىزگى باعىتتارىن ءتۇسىندىرۋ بويىنشا وتكەن كەڭەستە ءبىلدىردى.

بولات باقاۋوۆ ءوزىنىڭ ورىنباسارى مەيرام بەگەنتايەۆقا جانە ءبىلىم باسقارماسىنىڭ باسشىسىنا بۇل باستاما ءۇشىن مۇمكىندىكتەردى زەردەلەۋدى تاپسىردى. «بالالار بالاباقشادان كەيىن مەكتەپكە بارعان كەزدە، قازاق ءتىلدى مەكتەپكە نە ورىس تىلدىگە باراتىنىن ءوزى شەشسىن. ەسەسىنە، بالاباقشادان كەيىن ولاردا مەملەكەتتىك ءتىلدىڭ ىرگەتاسى بولادى. ورىس جانە اعىلشىن تىلدەرىندە پاندەر مەكتەپتەردە ۇيرەتىلەدى»، - دەپ اتاپ ءوتتى ول.

اكىمنىڭ سوزىنشە، 2019 -جىلدان باستاپ 10 جانە 11-سىنىپ وقۋشىلارى كەيبىر پاندەردى اعىلشىن تىلىندە وقيتىن بولادى. باقاۋوۆ سونداي-اق وتىرىس بارىسىندا ەلباسىنىڭ تاپسىرماسى بويىنشا پاۆلودار وبلىسىندا 2017 -جىلدان باستاپ كاسىبي جانە تەحنيكالىق ءبىلىم بەرۋدى اقىسىز نەگىزگە اۋىستىرۋ جۇرگىزىلەتىنىن ايتتى.