تەرگەۋشى سۋديالار تەرگەۋشىلەر مەن پروكۋرورلاردىڭ زاڭسىز ارەكەتتەرىنە توسقاۋىل بولدى

استانا. قازاقپارات - قازاقستاندا تەرگەۋ مەن پروكۋراتۋرانىڭ زاڭسىز ارەكەتتەرىنە توتەپ بەرەتىن جۇيە ءوز تيىمدىلىگىن كورسەتە باستادى، دەپ حابارلايدى قازاقپارات ءتىلشىسى.

وتكەن ءبىر جىلدىڭ ىشىندە تەرگەۋشى سۋديالاردىڭ قاراۋىنا 60 مىڭنان استام ماتەريال ءتۇستى. «سونداي- اق اتالعان سۋديالار تەرگەۋگە دەيىنگى، تەرگەۋ كەزىندەگى جانە پروكۋراتۋرانىڭ جۇمىسىنا قاتىستى ارىز- شاعىمداردى زەردەلەپ شىقتى. سونىڭ تورتتەن ءبىر بولىگى راستالدى. ال قىلمىستىق جازالاۋ ورگاندارىنىڭ ارەكەتتەرى زاڭسىز دەپ تانىلدى. وسىلايشا، سوتقا دەيىنگى كەزەڭدە ءبىراز ادامداردىڭ قۇقىقتارى قورعالدى. بۇگىندە ەل ازاماتتارىنىڭ وسى تەرگەۋشى سۋديالاردىڭ قىزمەتىنە ءجيى جۇگىنەتىندەرىن ەرەكشە اتاپ وتكەن ءجون. دەمەك، اتالعان ينستيتۋت ءوز تيىمدىلىگىن كورسەتتى»، - دەيدى جوعارعى سوتتىڭ قىلمىستىق ىستەر جونىندەگى سوت القاسىنىڭ ءتوراعاسى اباي راحمەتۋلين.

 ايتا كەتەيىك، وتكەن جىلى قازاقستان سوتتارىندا قارالعان قىلمىستىق ىستەردىڭ سانى ارتتى. دەگەنمەن، بۇگىندە ەكى جاق ىمىراعا كەلىپ، قىلمىس جاساعانداردى ءجيى بوساتا باستادى. بىلتىر سوتتارعا تۇسكەن  16529 قىلمىستىق ءىس توقتاتىلىپ،  18854 ادام جازادان قۇتىلدى. «ولاردىڭ بارلىعى زارداپ شەككەن جاقپەن ىمىراعا كەلىپ، شىعىندى تولىعىمەن وتەدى. ءسويتىپ، اقتاۋ ۇكىمدەرىنىڭ سانى 19,2 پايىزعا ارتىپ وتىر. وسىنىڭ ءوزى سوت تورەلىگىن جۇزەگە اسىرۋ بارىسىندا ادامدى قاماۋعا الۋ شارالارىنىڭ ازايىپ كەلە جاتقانىن كورسەتسە كەرەك»، - دەيدى راحمەتۋللين. ال جەمقورلار ايىپپۇلدىڭ باسىم بولىگىن بيۋدجەتكە تولەپ ۇلگەردى.

اۆتور: ارمان اسقاروۆ