16:08, 01 - اقپان 2017 | GMT +6
سەناتور نازاربايەۆا جاپونيا ەلشىسىمەن كەزدەستى
استانا. قازاقپارات - پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى داريعا نازاربايەۆا جاپونيانىڭ قازاقستانداعى توتەنشە جانە وكىلەتتى ەلشىسى يتيرو كاۆاباتامەن كەزدەستى.
مەيمانمەن كەزدەسۋدە سەناتور مەملەكەت باسشىسىنىڭ وتكەن جىلعى قاراشاداعى جاپونياعا رەسمي ساپارىنىڭ ناتيجەلى ءارى مازمۇندى بولعانىن اتاپ ءوتتى.
ي. كاۆاباتا قازاقستان مەن جاپونيا اراسىنداعى ديپلوماتيالىق قاتىناستاردىڭ ورناعانىنا 25 جىل تولۋىمەن قۇتتىقتادى جانە ەكىجاقتى قاتىناستاردى دامىتۋدا مەرەيلى جىل قوسىمشا سەرپىن بەرەتىنىن اتاپ ءوتتى.
ەلشى ەكى ەلدىڭ زاڭ شىعارۋ ورگاندارى اراسىنداعى ىنتىماقتاستىقتى ۇدەتۋ ماقساتىندا الداعى ۋاقىتتا جاپون پارلامەنتشىلەرىنىڭ ساپارى تۋرالى حاباردار ەتتى.
تاراپتار ەكىجاقتى بايلانىستاردىڭ ەكونوميكالىق، گۋمانيتارلىق جانە مادەني ماسەلەلەرىن دە تالقىلادى.
كەزدەسۋ سوڭىندا جاپونيا ەلشىسى قازاقستاندىقتاردى الماتىداعى دۇنيەجۇزىلىك قىسقى ۋنيۆەرسيادانىڭ اشىلۋىمەن قۇتتىقتادى.
اۆتور: سەرىك قاراجان
