15:10, 01 - اقپان 2017 | GMT +6
پان گي مۋن وڭتۇستىك كورەياداعى پرەزيدەنت سايلاۋىنا تۇسپەيتىن بولدى
استانا. قازاقپارات - ب ۇ ۇ- نىڭ بۇرىنعى باس حاتشىسى پان گي مۋن وڭتۇستىك كورەيا پرەزيدەنتتىگى ءۇشىن بولاتىن سايلاۋعا تۇسپەيدى. «مەن ساياساتتان كەتەمىن. كوپ ادامداردى ۇمىتتەندىرگەنىم ءۇشىن كەشىرىم سۇرايمىن»، - دەدى ول پارلامەنتتەگى باسپا ءسوز ءماسليحاتىندا كونسەرۆاتيۆتى پارتيانىڭ باسشىلارىمەن كەزدەسكەننەن كەيىن.
قاڭتار ايىندا ا ق ش بيلىگى ب ۇ ۇ- نىڭ بۇرىنعى باس حاتشىسىنىڭ جيەنى مەن ىنىسىنە ايىپ تاقتى. ولار لاۋازىمدى تۇلعاعا پارا بەرىپ، ۆەتنامداعى عيمارات كەشەنىن الۋ ءۇشىن جەمقورلىق جاسادى دەپ ايىپتالۋدا.
2016 -جىلدىڭ جەلتوقسان ايىندا وڭتۇستىك كورەيا پارلامەنتى ەل پرەزيدەنتى پاك كىن حەنىڭ اينالاسىنداعى جەمقورلىق داۋىنا بايلانىستى يمپيچمەنتتى باستاۋعا داۋىس بەردى. پرەزيدەنتتى قىزمەتىنەن بوساتۋ تۋرالى شەشىمدى وڭتۇستىك كورەيانىڭ كونستيتۋتسيالىق سوتى قابىلدايدى. ءىستىڭ قارالۋ مەرزىمى كەم دەگەندە جارتى جىلعا دەيىن سوزىلادى.
وڭتۇستىك كورەيانىڭ كونستيتۋتسيالىق سوتىنداعى داۋىس بەرۋ ناتيجەسى بەكىتىلسە، جاڭا پرەزيدەنت سايلاۋى وتەدى.
