وزبەكستاندىقتارعا كەدەن وداعى ەلدەرىنە ناسىباي الىپ بارماۋ ەسكەرتىلدى

استانا. قازاقپارات - وزبەكستان مەملەكەتتىك كەدەن كوميتەتى كەدەن وداعىنا مۇشە ەلدەردىڭ (بەلارۋس، قازاقستان، رەسەي) ناسىبايعا تىيىم سالىنعانىن ازاماتتاردىڭ ەسىنە سالدى، دەپ حابارلايدى gazeta.uz.

تەمەكى مەن وزگە قوسپالاردان تۇراتىن ناسىباي وزبەكستان مەن وعان كورشىلەس ەلدەردە كەڭىنەن تاراعان. كەدەن وداعى ەلدەرىنە ناسىبايدى الىپ كىرۋگە، اينالىمعا جىبەرۋگە وندىرۋگە جانە ساقتاۋعا تىيىم سالىنعان.

وزبەكستاننىڭ مەملەكەتتىك كەدەن كوميتەتىنىڭ دەرەكتەرى بويىنشا، 2016 -جىلى ءبىر عانا «تاشكەنت- مينسك» اۋە رەيسىنىڭ جولاۋشىلارىنان 100 كەلىدەن استام ناسىباي تاركىلەنگەن (43 كەدەندىك زاڭنامانى بۇزۋ فاكتىسى بويىنشا).

قۇقىق بۇزۋشىلار بارعان ەلدىڭ زاڭناماسى بويىنشا جاۋاپقا تارتىلادى. ءتارتىپتى ساقتاي وتىرىپ، جولاۋشىلار ءوزىن عانا ەمەس، ءوز ەلىنىڭ ابىرويىن دا قورعايدى، دەلىنگەن وزبەكستان كەدەن مەكەمەسىنىڭ حابارلاماسىندا.