قىرعىز رەجيسسەرى قازاقستان پرەزيدەنتى تۋرالى فيلم ءتۇسىردى
بۇل تۋرالى ول باسپا ءسوز ءماسليحاتىندا ءمالىم ەتتى، دەپ حابارلايدى knews.kg. فيلم قىرعىز جانە ورىس تىلدەرىندە جۇرگىزىلەدى. اۆتورلاردىڭ ايتۋىنشا، نازاربايەۆ جاس كەزىندە بىرنەشە جىل قىرعىزستاندا جۇرگەن، فيلم ءدال وسى كەزەڭگە ارنالعان.
«ءبىز نازاربايەۆپەن تانىس بولعان، دوس بولعان بىرنەشە ادامدى تاپتىق. ولار بىزگە قىزىقتى سۇحبات بەردى. نازاربايەۆ قىرعىزستاندا وسكەن، ول ءبىزدىڭ ءتىلىمىزدى، حالقىمىزدى، مادەنيەتىمىزدى جاقسى بىلەدى. قازىر قازاقستاندا 300 مىڭعا جۋىق قىرعىزستاندىق ميگرانت ءجۇر، بۇل ءۇشىن وعان العىسىمىزدى بىلدىرەمىز»، - دەدى ومۋرزاك تولوبەكوۆ.
فيلمدى قۇراستىرۋشىلاردىڭ ايتۋىنشا، قازاقستان پرەزيدەنتى ءوزىنىڭ جاستىق شاعىن ەسكە سالاتىن فيلمدى كورىپ ۇلگەردى. سونداي-اق، پروديۋسەرلەر جوبانى ءوز قاراجاتتارىنا تۇسىرگەنىن، فيلم بيۋدجەتى 20 مىڭ دوللاردى قۇراعانىن اتاپ ءوتتى.
فيلم 55 مينۋتقا سوزىلادى. كارتينانى بيىلعى 17 -اقپاننان باستاپ، قىرعىزستان كينوتەاترلارىنان تاماشالاۋعا بولادى، دەپ جازادى kabar.kg.
«فيلم بيۋدجەتى 20 مىڭ دوللاردى قۇرايدى. ونى ءوزىمىز قارجىلاندىردىق جانە باۋىرلاس قازاقتاردان كينو ءتۇسىرۋ ءۇشىن اقشا سۇراعان جوقپىز. جالعىز سۇراعانىمىز - فيلمدى قازاقستاندىق تەلەارنالاردا كورسەتۋ عانا»، - دەدى و. تولوبەكوۆ.
