قازاقستاندا مەملەكەتتىك قىزمەتكەرلەردىڭ سىناق ەمتيحانى باستالادى
ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اقپاراتىنا سايكەس، اتتەستاتسيا ءۇش باعىتتا جۇرەدى.
الدىمەن دەپارتامەنت ديرەكتورلارى، وبلىستىق باسقارما باسشىلارى، سونداي-اق پرەزيدەنت اكىمشىلىگى مەن پرەمەر- مينيستر كەڭسەسىنىڭ قىزمەتكەرلەرى سىناق تاپسىرادى. ولاردىڭ دايىندىعىن جوعارى اتتەستاتسيالىق كوميسسيا تەكسەرەدى.
اتالعان كەزەڭ ناۋرىزدىڭ 15 ىنە دەيىن جالعاسادى. ەكىنشى دەڭگەيدە مينيسترلىكتەر مەن وبلىس اكىمدىكتەرىنىڭ اتتەستاتسيالىق كوميسسيالارى ورتالىق مەملەكەتتىك ورگانداردا ىستەيتىن قىزمەتكەرلەردەن، سونداي-اق اۋىلدىق وكرۋگ اكىمدەرىنەن سىناق قابىلدايدى.
بۇل جۇمىس مامىردا اياقتالادى. ال اۋدانداعى اتتەستاتسيالىق كوميسسيالار اۋدان مەن اۋىلدىڭ مەملەكەتتىك قىزمەتكەرلەرىن تەكسەرىپ شىقپاق. ءۇشىنشى دەڭگەيگە جاتاتىن بۇل كەزەڭ ماۋسىم ايىنا دەيىن جالعاسادى.
ايتا كەتەيىك، بۇعان دەيىن استانادا وتكەن باسپا ءسوز ءماسليحاتىندا مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگى ءتوراعاسىنىڭ ورىنباسارى ايگۇل شايىموۆا تەست تاپسىرمالارى تۋرالى ايتقان بولاتىن. «ب» كورپۋسىنا كىرەتىن مەملەكەتتىك قىزمەتشىلەر اتتەستاتسيانى بەينەبايلانىس ارقىلى تاپسىرا الادى. سونداي-اق، ءبىرقاتار قىزمەتشىلەر اتتەستاتسيادان بوساتىلادى.
