شىمكەنتتىك سۇرانىسقا يە ويىنشىقتار ەكسپورتقا شىعارىلادى - فوتو

شىمكەنت. قازاقپارات - شىمكەنتتىڭ ويىنشىقتارى جۋىق ارادا ەكسپورتقا جول تارتپاق.

سوڭعى ۋاقىتتا كەڭ سۇرانىسقا يە بولعان ونىمدەر حالىقارالىق تالاپتارعا ساي بىرنەشە تەكسەرۋلەردەن ءوتىپ، ەكولوگيالىق جاعىنان تازا دەپ تانىلعان، - دەپ حابارلايدى «قازاقپارات» ح ا ا ءتىلشىسى.

قازىر ءبىرقاتار مەملەكەتتەرمەن كەلىسسوزدەر جۇرگىزىلىپ، حالىقارالىق نارىققا شىعۋ جاعى قامدالۋدا. ايتا كەتەيىك، «ناۋرىز پلاستيك» ويىنشىقتارى 2013 -جىلدان باستاپ ساۋدالانا باستادى. بۇگىندە زاۋىت ويىنشىق كولىكتىڭ 10 ءتۇرى مەن قۇراستىرعىشتىڭ 5 ءتۇرىن شىعارادى. ءونىمنىڭ ءار بولشەگى جەكە-جەكە دايىندالىپ، سوڭىنان قۇراستىرۋعا جىبەرىلەدى. ماماندار ويىنشىق جاساۋدا بالانىڭ قاۋىپسىزدىگىنە باسا ءمان بەرىلەدى، جاراقاتتامايتىنداي جۇمىر، تەگىس، قاۋىپسىز زاتتار قولدانىلادى دەيدى.

كاسىپورىندى اشقانعا دەيىن يران، قىتاي، وزبەكستان ەلدەرىنەن ويىنشىق اكەلىپ ساتقان زاۋىت قوجايىنى ءوندىرىستى جولعا قويعانشا ءبىراز قيىندىقتاردى باستان وتكەرگەنىن ايتادى. «بيزنەستىڭ جول كارتاسى - 2020» باعدارلاماسى بويىنشا 10 ميلليون تەڭگەدەن استام نەسيە الدىم. ونىڭ ۇستىنە ءوزىمىزدىڭ بار جيعان-تەرگەنىمىزدى قوسىپ، قىتايدان ارنايى قوندىرعىلار ساتىپ اكەلدىك. الايدا قۇرال-جابدىقتار مەن قاجەتتى شيكىزاتقا قول جەتكىزگەنىمىزبەن، كوپ كەدەرگىگە تاپ بولدىق. ويتكەنى تەحنيكانىڭ ءتىلىن ءتۇسىنىپ، ۇعاتىن مامان تاپشى ەدى. سول كەزدە قىتايدا ءبىلىم الىپ، ويىنشىق زاۋىتىندا تاجىريبە جيناپ جۇرگەن ۇلىم ناۋرىزبەككە تەلەفون سوعىپ، عالامتور ارقىلى بار بىلگەنىمەن ءبولىسىپ تۇردىق. ايتەۋىر كەيىن ويىنشىقتارىمىزدى شىعاردىق» - دەيدى رابيعا بايتەمىروۆا.

ويىنشىقتىڭ ساپالى، ۇيلەسىمدى شىعۋى تەحنولوگتىڭ باعدارلاماسىنا بايلانىستى. كومپيۋتەر باعدارلامالارىن جەتىك ءبىلىپ، تەمپەراتۋرا، ۋاقىت جيىلىگى مەن قوسپا مولشەرىن دۇرىس، ءدال قويا ءبىلۋ قاجەت ەكەن. باستاپقىدا بۇل سالانىڭ ماماندارى بولماعاندىقتان، كاسىپكەردىڭ جۇبايى قىتايعا بارىپ، ءبىلىمىن جەتىلدىرىپ قايتىپتى.

كەيىن زاۋىتتاعى جۇمىسشىلارعا ۇيرەتكەن. بۇگىندە ءوندىرىس ورنىنداعى ماماندار ويىنشىق شىعارۋعا ابدەن توسەلىپ قالىپتى. «ءبىزدىڭ ونىمدەرىمىزدىڭ باعاسى ءارتۇرلى. ماسەلەن، «ماك» ماركالى ويىنشىق جۇك كولىكتەرىمىز 400-1100 تەڭگە ارالىعىندا، ال بالالاردىڭ وزدەرى وتىرىپ، باسقارۋعا لايىقتالعان مۋزىكالىق قۇرىلعىلارى بار ويىنشىق كولىكتەر 2800-3200 تەڭگە ارالىعىندا ساتىلادى. شەلەكتەگى «لەگو» قۇراستىرمالى ويىنشىقتاردىڭ ەڭ ارزانى 300 تەڭگەدەن باستالادى. كولەمىنە قاراي باعاسى دا وسە بەرەدى»، - دەيدى زاۋىت قىزمەتكەرى ج. ماۋلەنوۆا. ءوڭىر ەكونوميكاسىنا ءوز ۇلەسىن قوسىپ كەلە جاتقان زاۋىتتا بۇگىندە 13 تۇرعىن تۇراقتى جۇمىسپەن قامتىلعان.

ال، جاقىن كۇندەرى «يندۋستريالدى ايماقتا» سالىنعان جاڭا عيماراتقا كوشۋدى جوسپارلاپ وتىر. سونىمەن قاتار، ءوندىرىس ورنى جىل سايىن وتەتىن وتاندىق ونىمدەر كورمەسىنە قاتىسىپ، قازاقستاندا جاسالعان ويىنشىقتاردى تانىستىرىپ وتىرادى. بيىلعى جىلى حالىقارالىق «ەكسپو-2017» كورمەسىنە دە قاتىسپاق نيەتتە. وسىلايشا، نارىقتان ساپاسىز ويىنشىقتار بىرتە-بىرتە ىعىستىرىلىپ، ورنىن وتاندىق ءونىم باسىپ كەلەدى.

اينۇر اقبايەۆا