ديماش بولاشاقتا «ەۆروۆيدەنيە» بايقاۋىنا بارۋى كەرەك - مۋزىكالىق كوللەدج ديرەكتورى

اقتوبە. قازاقپارات - ديماش قۇدايبەرگەن احمەت جۇبانوۆ اتىنداعى مۋزىكالىق كوللەدجدە ءتورت جىل بويى ءبىلىم الدى.

ول اكادەميالىق ءان سالۋ ءبولىمىنىڭ تۇلەگى. ۇستازى - مارات ءايتىموۆ. كوللەدجدە وقىپ جۇرگەن كەزىندە داۋىسىنىڭ ەرەكشەلىگىن بايقادىق. بوياۋى، دياپازونى ەشكىمگە ۇقسامادى. انشىلەرىمىز 2 وكتاۆا الاتىن بولسا، ول ءاندى بىردەن 3 وكتاۆودا ورىندادى. قازىر ءتورت وكتاۆوعا جەتتى. بۇل وتە سيرەك كەزدەسەدى. بىزدە ەمەس، الەمدە سيرەك كەزدەسەتىن داۋىس.

بۇل تۋرالى «قازاقپارات» تىلشىسىنە احمەت جۇبانوۆ اتىنداعى مۋزىكالىق كوللەدج ديرەكتورى امانجول يسماعۇلوۆ ايتتى.

ديماش قۇدايبەرگەن قىتايدا ءوتىپ جاتقان «مەن ءانشىمىن» اتتى بايقاۋدىڭ العاشقى كۇنى-اق ەرەكشە كوزگە ءتۇسىپ، ەل قۋانىشىنا بولەنە باستادى. بايقاۋدىڭ ءار اينالىمىن ۇزبەي كورىپ، بەينە سالەمدەمە، قولداۋ حات جىبەرىپ وتىرعان ۇجىمدار اراسىندا احمەت جۇبانوۆ اتىنداعى مۋزىكالىق كوللەدج دە بار.

سەبەبى، ديماش وسىندا ءبىلىم الدى، قالىپتاستى، ۇلكەن ساحناعا جول اشىلدى. «ديماش مۋزىكالىق ستۋديادا وقىدى. ال كوللەدجگە تۇسكەن كەزدە تىڭدالىم ءوتىپ، داۋىسىنىڭ ەرەكشەلىگى بىردەن بايقالدى. ول - تابيعي داۋىس يەسى، تەگىنە تارتقان. اتا- اناسى قانات پەن سۆەتا ايتبايەۆتار ەلگە تانىمال ءانشى.

بىردەن كلاسسيكالىق ەمەس، ەسترادالىق ءان ونەرىنە بەيىم ەكەنى كورىندى. بىزدە ەسترادا ءبولىمى بولعان جوق. سوندىقتان اكادەميالىق اندەردى ايتتى. ەمتيحانداردا ءوز باعدارلاماسىن تولىق ورىندادى. بۇل ديماشتىڭ تاڭداۋى، باعىتى. ۇستازى مارات ءايتىموۆ ەشكىمگە ۇقسامايتىن ادىستەمەسىمەن تاربيەلەدى»، - دەدى مۋزىكالىق كوللەدجدىڭ ديرەكتورى امانجول يسماعۇلوۆ. احمەت جۇبانوۆ اتىنداعى مۋزىكالىق كوللەدجدە ءبىلىم العان ديماش قۇدايبەرگەن 2-كۋرستان باستاپ ءتۇرلى بايقاۋلارعا قاتىستى.

العاشقىسى - «ۆوستوچنىي بازار» بايقاۋى. ول بىردەن باس جۇلدەنى يەلەندى. كوپتىڭ قوشەمەتىنە بولەندى، الماتى مەن استاناداعى كونسەرۆاتوريا، ونەر اكادەمياسى باسشىلارىنىڭ كوزىنە ءتۇستى. ولار ديماشتى وزدەرى تاربيەلەۋدى ماقسات ەتتى.

«الماتى، استاناعا بارعان كەزدە وقۋ بولمايدى. بولسا دا، بىزدىكىندەي ەمەس. سەبەبى، ول جەردەگى وقىتۋشىلار قۇرامى، پروفەسسورلار ۇنەمى گاسترولدە جۇرەدى، دايىندىققا ۋاقىت از بولادى. بۇل - ءبىر. ەكىنشىدەن، ديماشتىڭ ەرەكشە داۋىسىن بايقاعان كەزدە كونسەرتتەرگە كوپ شىعاراتىن بولادى. اقتوبەدە دە كونسەرتتەر بار، ءبىراق دايىندىققا ۋاقىت كوپ ەدى. سول كەزدە قانات ايتبايەۆ كەلىپ، وعان كەڭەس بەردىم.

«ديماشتىڭ داۋىسى قاتايعان جوق، قالىپتاسىپ كەلە جاتىر. ەمتيحانداردا تىڭدايمىز، ءبارى دۇرىس. بولاشاعى زور بالانى قايتا-قايتا كونسەرتتەرگە اپارىپ، داۋىسىن بۇزىپ الۋىمىز دا مۇمكىن. ءارى ۇيدەگىدەي باپ بولمايدى. ءوزى ءتارتىپتى، يناباتتى بالا. ۇيدەن ۇزاپ شىعىپ كورمەگەن. 19 جاسقا دەيىن اقتوبەدە بولسا، داۋىسى قاتايعان سوڭ كونسەرۆاتورياعا تۇسەدى» دەپ ايتتىم. قانات جىبەرمەدى، ديماش وسى جەردە وقۋىن ءبىتىردى»، - دەدى ا. يسماعۇلوۆ. بۇعان دەيىن «ۆوستوچنىي بازار»، «سلاۆيان بازارى» بايقاۋلارىندا توپ جارعان ديماش قازىر قىتاي ساحناسىن باعىندىرىپ ءجۇر. كۇن وتكەن سايىن ابىرويى ارتىپ، تانىمالدىلىعى ەسەلەنە ءتۇستى. الدا ءالى 12 اينالىم بار. ءار اپتا سايىن ءانىن تىڭداپ، تامسانىپ، تاڭ قالىپ وتىراتىن مۋزىكالىق كوللەدج ۇجىمى الەۋمەتتىك جەلى ارقىلى ءوز قۇتتىقتاۋلارىن جەتكىزىپ وتىرۋدى ۇمىتقان ەمەس. كوبى باسەكەلەستەرىنەن قورقادى، ساقتانىپ ءجۇرۋىن تىلەيدى.

«جانىندا اكەسى قانات ايتبايەۆ ءجۇر. ول دۇرىس. قازىرگى ۋاقىتتا وكىنىشكە قاراي ءارتۇرلى جاعدايلار بولىپ جاتادى. ادامدار ءبىز كينودان كورىپ جۇرگەن كوپتەگەن قيتۇرقى ارەكەتتەرگە بارۋى مۇمكىن. تاماعىنا قوسىپ بەرەدى، داۋىسىن بۇزادى. ونداي جوق ەمەس، بار. كوبىنە ايتىلمايدى. كورىپ، ەستىپ جاتىرمىز. ۆيتەبسكىگە بارعاندا ديماش مۇنى ءوز باسىنان وتكەرگەن. قىتايدا دا باسەكەلەستىك مىقتى. ونى قارسىلاستارىنىڭ تاڭ قالعان تۇرىنەن كورىپ وتىرمىز. ۆيتاستىڭ ءانىن ورىنداعاندا «شالقالارىنان» ءتۇستى.

كوللەدجدە ءان ايتىپ جۇرگەندە دە «ارتىق الماسىنشى، جىرتىپ الادى داۋىسىن» دەپ قورقاتىن ەدىم. ۇستازى مارات ءايتىموۆ ونىڭ قورى بار ەكەنىن ءبىلدى، سەندى»، دەدى ا. يسماعۇلوۆ. ۇستازدارى ديماشتىڭ الار اسۋى ءالى الدا دەپ وتىر. ولار جاس تالانتتىڭ ەۋروپا ساحناسىن باعىندىرعانىن قالايدى.

«ديماش بولاشاقتا «ەۆروۆيدەنيە» بايقاۋىنا بارۋى كەرەك. تاريحتا قازاقستاننان ەشكىم قاتىسپاعان ول بايقاۋعا. ءبىر قورقاتىنىم، قانداي كونكۋرسقا بارسا دا ول ەكىنشى ورىن الىپ كورمەگەن. وعان پسيحولوگيالىق تا دايىندىق قاجەت. ەكىنشى ورىن السا، باسىلىپ قالۋى مۇمكىن. ديماش اقتوبەگە كەلگەندە كوللەدجگە ارنايى سوعادى. ءبىر كەلگەنىندە «جەر بەتىمەن ءجۇر، كوتەرىلمە. كوتەرىلسەڭ، جۇلدىز بولاسىڭ، ەشكىمدى تانىمايسىڭ» دەدىم. ديماشتا ونداي جوق.

اتا-اناسى جاقسى تاربيە بەرگەن. ەكىنشىدەن، ۇنەمى تاڭ قالدىرامىن دەگەن ويدان ارىلعان دۇرىس. قازىر تاڭ قالدىرىپ، داۋىسىڭدى جوعالتۋىڭ مۇمكىن. ۇنەمى قوردى ساقتاپ، ودان بيىك الۋدان ساقتانۋ قاجەت. بۇل مامان رەتىندە ايتقان اقىلىم»، - دەدى مۋزىكالىق كوللەدج ديرەكتورى.

امانجول يسماعۇلوۆتىڭ ايتۋىنشا، بۇل ەرەكشە ەكىنشى داۋىس. ءدال وسى داۋىس الەم دەڭگەيىندە ءان شىرقاعان ەرىك قۇرمانعاليەۆتە بولعان. «1983 -جىلى ول الماتىداعى كونسەرۆاتورياسىنا تۇسۋگە كەلىپ، ۇستازدار ماسكەۋگە جىبەردى. ەكىنشى كۋرستا ەۋروپاعا بارىپ، التينو داۋىسىمەن باس جۇلدە الدى. الماتىدا كونسەرتىن بولدى. وكىنىشكە قاراي، تۋما تالانت، تابيعي داۋىس يەسى قازا بولدى. كوزىڭدى جۇمىپ تىڭداساڭ، قىز ءان سالىپ تۇرعانداي ەدى. سودان كەيىنگى ەكىنشى داۋىس - ديماشتا. ەرەكشەلىگى - ەرىك وپەرا، ديماش ەسترادا باعىتىندا. ديماش تا الەم دەڭگەيىندەگى مىقتى ءانشى»، - دەدى ا. يسماعۇلوۆ.

ايتا كەتەيىك، احمەت جۇبانوۆ اتىنداعى مۋزىكالىق كوللەدج تۇلىكتەرى جان جاقتا ءجۇر. ءان سالۋ ءبولىمىنىڭ العاشقى مەڭگەرۋشىسى نيكولاي تاۋبەكوۆ. كوللەدج تۇلەكتەرىنىڭ اراسىندا ماسكەۋدەگى وپەرا جانە بالەت تەاترىنىڭ سوليسى سۆەتلانا كوسيان، ءانشى ءومىرقۇل اينيازوۆ، ميراس بەكجانوۆ، ەركە ەسماحان، قايرات قاپانوۆ، اباي اتىنداعى وپەرا جانە بالەت تەاترىنىڭ سوليسى ەسەنگەلدى ىرزا، ۆەنەرا الپىسبايەۆا، ءانشى قايرات يگىلىكوۆ، دينارا تاۋبەكوۆا بار. قازىرگى كۇنى اكادەميالىق ءان سالۋ بولىمىندە زۋحرا تولەمىسوۆا مەن تاعى ءۇش ۇستاز ەڭبەك ەتىپ جاتىر. بۇل بولىمدە بارلىعى 35 بالا ءبىلىم الىپ ءجۇر.

ديماش قۇدايبەرگەننىڭ سۋرەتى مۋزىكالىق كوللەدجدىڭ اكادەميالىق ءان سالۋ بولىمىندە، دازىلدە، ۇستازدارىنىڭ كابينەتىندە ءىلۋلى تۇر. بۇل - ماقتانىش، ابىروي. ال ديماش قۇدايبەرگەن احمەت جۇبانوۆتىڭ پورترەتىن كوللەدجگە سىيعا بەرگەن. بۇل - تۇلەكتىڭ العىسى، ريزاشىلىعى.

التىناي ساعىندىقوۆا