قازاقستاندا حالال يندۋسترياسىن دامىتۋ تۇجىرىمداسىن ازىرلەۋ قاجەت
«ەلىمىزدە كوپتەگەن مەكەمەلەردىڭ، ۇكىمەتتىك جانە ۇكىمەتتىك ەمەس ۇيىمداردىڭ حالال نارىعىنا قىزىعۋشىلىعى جوعارى. سوندىقتان حالال ماسەلەسىندەگى ءاربىر مەكەمەنىڭ ورنىن انىقتاۋ قاجەت. قاي مەكەمە نەگە جاۋاپ بەرەتىندىگىن بەلگىلەۋ كەرەك. سوندا عانا ءبىز وڭتايلى حالال يندۋسترياسىن قۇرا الامىز. بۇعان قوسا، ەلىمىزدەگى حالال يندۋسترياسىنىڭ دامۋ تۇجىرىمداماسىن ازىرلەۋ قاجەت»، - دەدى ماجيەۆ ەلوردادا ءوتىپ جاتقان حالال يندۋسترياسى سالاسىنداعى مالايزيالىق ورگانداردىڭ وكىلدەرىمەن كەزدەسۋ اياسىندا ب ا ق وكىلدەرىنە بەرگەن سۇحباتىندا.
ونىڭ ايتۋىنشا، تۇجىرىمداما ازىرلەۋمەن اينالىساتىن ارنايى جۇمىس توبىن جاساقتاپ، ونى جۇزەگە اسىرۋدىڭ 2017-2020 -جىلدارعا نەمەسە 2017 -جىلدان باستاپ 5 جىلعا جوسپارىن ءتۇزۋ قاجەت. جوسپار ارقىلى حالال يندۋسترياسىن دامىتا وتىرىپ، حالىقارالىق، الەمدىك حالال ستاندارتىن بەرەتىن ۇيىمدارعا شىعۋعا بولادى.
سونداي- اق ماجيەۆ ب ا ق وكىلدەرىنىڭ ساۋالىنا وراي ءدىني باسقارما اتىنان تىركەلگەن 80 نەن استام كاسىپورىن حالال ستاندارتىمەن جۇمىس ىستەيتىندىگىن اتاپ ءوتتى.
«ءبىز ولارعا جاۋاپ بەرەمىز جانە باسقارمانىڭ اتىنان ءدىني، شاريعات، ستاندارت جاعىنان ولاردىڭ ونىمدەرىنىڭ حالال ەكەندىگىنە كامىل سەندىرەمىز. ال باسقا مەكەمەلەردىڭ قانشا كاسىپكەرلىككە حالال ستاندارتىن بەرگەندىگى جايىندا اقپاراتىمىز جوق. جالپى، وسىدان ءبىراز ۋاقىت بۇرىن «ادال» دەگەن لوگوتيپ جوسپار تۇرىندە ەنگىزىلگەن. ءبىراق، قازىرگى ۋاقىتتا حالىقارالىق ستاندارتتارعا سايكەس «قازاقستان مۇسىلماندارى ءدىني باسقارماسى، ال ورتاسىندا حالال» دەگەن جازۋى بار لوگوتيپ بەرەمىز»، - دەدى ول.
ايتا كەتەيىك، بۇعان دەيىن قازاقستان مۇسىلماندارى ءدىني باسقارماسىنىڭ اپپارات باسشىسى عيلىمبەك ماجيەۆتىڭ ەلىمىزدە حالال دەگەن ءبىر عانا لوگوتيپ بولۋى قاجەت دەگەن پىكىرىن جاريالاعان بولاتىنبىز.
اۆتور: مارلان جيەمباي
