قازاقستاندا حالال دەگەن ءبىر عانا لوگوتيپ بولۋى قاجەت - ءدىني باسقارما

استانا. قازاقپارات - قازاقستاندا حالال دەگەن ءبىر عانا لوگوتيپ بولۋى قاجەت. مۇنداي پىكىردى قازاقستان مۇسىلماندارى ءدىني باسقارماسىنىڭ اپپارات باسشىسى عيلىمبەك ماجيەۆ ءبىلدىردى،

دەپ حابارلايدى قازاقپارات.

 «ءبىز ءبىر اپتا بويى مالايزيا ەلىنەن كەلگەن حالال يندۋسترياسىن دامىتۋ جونىندەگى كەڭەسشى توپپەن كەزدەسۋ وتكىزۋدەمىز. بۇل جۇمىس توبى ءبىز ءۇشىن وتە ماڭىزدى. ويتكەنى، قازاقستان تاۋەلسىزدىك العان 25 جىلدىڭ ىشىندە ەكونوميكا، ساياسات، ءدىن سالالارىندا ۇلكەن جەتىستىككە جەتتى. ءبىراق، وسى حالال ماسەلەسىن، ونى رەتتەۋ ءالى دە كەمشىن ءتۇسىپ جاتىر. ال مالايزيالىق مامانداردان ءبىز ەڭ الدىمەن حالالدى قالاي دامىتۋعا بولاتىندىعىن بىلەمىز. حالال يندۋسترياسى الەمدە ۇلكەن جۇيەگە اينالىپ وتىر. قازىرگى كۇنى حالال نارىعىنىڭ قارجى اينالىمى 2,6 تريلليون دوللاردى قۇرايدى. سوندىقتان حالال ستاندارتىنا قاراپايىم ادامداردان باستاپ، مەملەكەتتىك ەمەس ۇيىمدار، مەملەكەت تارابىنان دا قىزىعۋشىلىق وتە زور. ءبىراق، وسى قىزىعۋشىلىقتىڭ سوڭىنا ەرىپ كەتپەي، حالال ادال قىزمەت ەكەندىگىن قاپەردەن شىعارماۋعا ءتيىسپىز»، - دەدى ول ەلوردادا ءوتىپ جاتقان حالال يندۋسترياسى سالاسىنداعى مالايزيالىق ورگانداردىڭ وكىلدەرىمەن كەزدەسۋ اياسىندا ب ا ق وكىلدەرىنە بەرگەن سۇحباتىندا.

 ونىڭ ايتۋىنشا، قازاقستان مۇسىلماندارى ءدىني باسقارماسى ءۇشىن حالال باستى پايدا تابۋ كوزى ەمەس. باسقارمانىڭ باستى ۇستانىمى - ەلىمىزدە حالال يندۋسترياسىن جولعا قويۋ.

 «كەزدەسۋ بارىسىندا ءبىز ءوز تارابىمىزدان ەل ۇكىمەتىنە، قۇزىرلى ورگاندارعا ءبىرقاتار ۇسىنىس بەرمەكپىز. ماسەلەن، قازاقستاندا حالال دەگەن ءبىر عانا لوگوتيپ بولۋى قاجەت. ويتكەنى، يندونەزيانىڭ، قىرعىزستاننىڭ، برۋنەيدىڭ، قىتايدىڭ حالال ستاندارتىن دامىتۋ باعىتتارىن كوردىك. تاجىريبەگە وراي ءبىر ەلدە ءبىر لوگوتيپتىڭ بولۋى - بۇل ەڭ الدىمەن تۇتىنۋشىلاردىڭ، مەملەكەتتىڭ، سىرتتان تاۋار اكەلەتىن كاسىپكەردىڭ جۇمىس جاساۋىنا قولايلى جاعداي جاسايتىن شارت. بۇعان قوسا بۇل لوگوتيپتى بەرۋ قۇقىعىنا قازاقستان مۇسىلماندارىنىڭ ءدىني باسقارماسى يە بولۋى قاجەت. سەبەبى، ءبىز ءۇشىن حالال ءدىني تەرمين. حالال دەگەنىمىز اللانىڭ مۇسىلماندارعا رۇقسات ەتكەن اسى، قىزمەتى، كيىمى دەگەندى بىلدىرەدى. جالپى، حالال مەن حارام تەرميندەرى قاتار جۇرەدى. مۇنى اللا تاعالانىڭ ەكى قىلىشى دەۋگە بولادى. بىرەۋى، رۇقسات ەتىلەدى، حالال دەيدى، ەكىنشىسى رۇقسات ەتىلمەيدى، حارام دەيدى. رۇقسات ەتىلگەنىنە نە ەتىلمەگەندىگىنە ۇكىم بەرۋ بۇل ءدىن ماماندارىنا بەرىلگەن قىزمەت»، - ماجيەۆ.

 ءدىني باسقارمانىڭ اپپارات باسشىسى دەرەكتەرىنە سايكەس، قازىرگى ۋاقىتتا ەلىمىزدە زاڭدى قۇرىلعان مەكەمەلەر 3-4 حالال لوگوتيپىن بەرۋدە.

اۆتور: مارلان جيەمباي