قازاق تىلىندە راديكالدى سايتتار قاپتاپ بارادى - ۇلتتىق قاۋىپسىزدىك كوميتەتى

استانا. قازاقپارات - ۇلتتىق قاۋىپسىزدىك كوميتەتى ينتەرنەتتە قازاق ءتىلدى راديكالدى سايتتاردىڭ كوبەيۋىنە الاڭداۋشىلىق ءبىلدىردى، دەپ حابارلايدى قازاقپارات.

ۇ ق ك لاڭكەستىككە قارسى ورتالىقتىڭ شتاب باسشىسى سەرگەي شۆەيكيننىڭ ءمالىم ەتۋىنشە، بۇرىن مۇنداي ءۇردىس بايقالماعان بولاتىن.

 «راديكالدانۋ وشاعى ينتەرنەت ەكەنى بارشاعا ءمالىم. ەكسترەميستىك ماتەريالداردىڭ سانى گەومەتريالىق پروگەسسيامەن ارتۋدا. بىلتىردىڭ وزىندە لاڭكەستىك پەن ەكسترەميزم يدەيالارىن ينتەرنەت ارقىلى تاراتۋدىڭ 700 مىڭ فاكتىسى انىقتالدى جانە جويىلدى. بۇل كورسەتكىش 2015 -جىلعىمەن سالىستىرعاندا 4,5 ەسەگە، 2014 -جىلعىمەن سالىستىرعاندا 33 ەسەگە كوپ. قازاق تىلىندە دە ماتەريالدار دايىندالا باستادى. بۇل ولاردىڭ ماقساتتىق باعىتتارىن كورسەتىپ وتىر. ءبىر جىل بۇرىن بۇنداي كورىنىستەر بىرنەشە ەسە از بولاتىن»، - دەدى ول باس پروكۋراتۋرادا وتكەن حالىقارالىق دوڭگەلەك ۇستەلدە.

ۇ ق ك وكىلى اتاپ وتكەنىندەي، Vider، Twitter، WhatsApp سىندى مەسسەندجەرلەردىڭ پايدا بولۋى، لاڭكەستەردىڭ ءبىر- بىرىمەن بايلانىس ورناتۋىنا جانە ءوز قىزمەتتەرىن ۇيلەستىرۋگە، باسقارۋعا كوپ جاعدايلار جاساپ وتىر.

«لاڭكەستەر ءاردايىم اككاۋنتتارىن اۋىستىرىپ وتىرادى، جەلىگە انونيمدىك ماتەريال مەن راديكالدى روليكتەردى جاريالاۋ ءۇشىن ارنايى باعدارلامالار قولدانادى. وزدەرىنىڭ گەوگرافيالىق ورنالاسقان جەرلەرىن ينتەرنەت ارقىلى انىقتاۋعا جول بەرمەيتىن تەحنيكالىق مۇمكىندىكتەردى پايدالانادى. وسىنىڭ اياسىندا ينتەرنەت- رەسۋرستار پايدالانۋشىعا سايتتاردا راديكالدى مازمۇنداعى ماتەريالدار تۋرالى ەسكەرتۋ بەرە المايدى. وسىنداي رەسۋرستاردىڭ باسشىلارى وزدەرىندە جاريالانىپ وتىرعان ماتەريالداردىڭ مازمۇنىنا ۇڭىلە بەرمەيدى»، - دەپ اتاپ ءوتتى ول.

وسى ورايدا، ق ر  ۇ ق ك ينتەرنەت جەلىسىندەگى راديكالدى ماتەريالدارعا قارسى ۇگىت- ناسيحات جۇمىستارىن بەلسەندى قولعا العان.

«جۇمىسىمىزدىڭ نەگىزگى باسىمدىقتارىنىڭ ءبىرى - لاڭكەستىك قاتەرىنىڭ الدىن الۋ بولماق. لاڭكەستىكتى ىشتەن جانە سىرتتان قارجىلاندىرۋدى الدىن الۋ جانە انىقتاۋ بويىنشا ارنايى شارالار جۇزەگە اسىرىلادى. سونىمەن قاتار قىلمىستىق توپتاردىڭ ءدىني- ەكسترەميستىك توپتارمەن بىرىگۋىن بولدىرماۋ كوزدەلگەن»، - دەدى شۆەيكين.

 ايتا كەتەيىك، بۇنىڭ الدىندا حابارلانعانىنداي، 2016 -جىلى لاڭكەستىك توپتاردى قارجىلاندىرعانى ءۇشىن قازاقستاندا 3 ادام قىلمىستىق جاۋاپكەرشىلىككە تارتىلدى.

اۆتور: جاسۇلان جولدىبايەۆ