اقەركە تاجىبايەۆا مەكسيكا جۇرتىن قوبىز ۇنىمەن تاڭ- تاماشا ەتتى

 استانا. قازاقپارات - اقەركە تاجىبايەۆا قازاقستان ساحناسىندا كوپ ونەر كورسەتپەيدى. بۇعان سەبەپ تە جوق ەمەس. ول وسى كۇنگە دەيىن كوپتەگەن شەتەلدىك مەملەكەتتەردە قازاقتىڭ كيەلى قوبىز ونەرىن ناسيحاتتاپ ءجۇر ەكەن.

بۇل تۋرالى قازاقستان ارناسىنىڭ «تاڭشولپان» باعدارلاماسىندا ايتىلدى.

- ءسىزدىڭ ءبىز بىلمەيتىن قانداي جاڭالىقتارىڭىز بار؟

- وتكەن جىلى تۇرمىسقا شىقتىم. ودان كەيىن دە ونەر جولىن تاستاعان ەمەسپىن. كورەيا ەلىندە ونەر كورسەتتىم، حالىقارالىق فەستيۆالگە قاتىستىم. ارادا ءبىر اپتا وتكەن سوڭ مەكسيكا ەلىندە قىلقوبىزشى رەتىندە العاش رەت كونسەرت بەردىم. ودان كەيىن بىردەن يسپانيا پاتشالىعىنا جول تارتتىم. سول جەردە ەلىمىزدىڭ تاۋەلسىزدىگىنىڭ مەرەيتويىنا ارنالعان مەرەكەلىك كەشتەردە ونەر كورسەتتىم.

- ولار ءسىزدىڭ ونەرىڭىزدى قالاي قابىلدادى؟

- كوپتەگەن سۇحباتتا وسى سۇراق قويىلادى. ەگەر سۇرانىس بولماسا، مەنى شاقىرمايتىن ەدى دەپ ويلايمىن. وسى ۋاقىتقا دەيىن 38 ەلدە قازاقتىڭ ۇلتتىق، ءداستۇرلى مۋزىكاسىن، قىلقوبىزىن تانىتىپ ءجۇرمىن. ءاربىر ەلگە بارعاندا بۇل اسپاپقا ەرەكشە قىزىعۋشىلىقپەن قارايدى. قىل ىشەكتەن توگىلگەن ءۇن تىڭداۋشىنىڭ جۇرەگىن جاۋلاپ، وعان رۋحاني ازىق بەرەدى. بۇل اسپاپتا تەك قورقىتتىڭ، ىقىلاستىڭ كۇيلەرىن عانا ەمەس، ءقازىر كوپتەگەن ۇلكەن قاۋىمدى شىعارمالاردى، قازاقستان مەن شەتەل سازگەرلەرىنىڭ تۋىندىلارىن ورىنداۋعا بولادى. وسىدان كەيىن تىڭداۋشىنىڭ قىزىعۋشىلىعى ارتا تۇسەدى. ديسكتەر تۋرالى سۇرايدى. مۇنىمەن قاتار، «وسى قوبىزدىڭ ءۇنىن ەستۋ ءۇشىن قازاقستانعا كەلۋگە بولادى ەكەن» دەپ پىكىر ءبىلدىرىپ جاتادى.

- وسى اسپاپپەن قازىرگى زاماناۋي شىعارمالاردى ورىنداپ ءجۇرسىز بە؟

- قىلقوبىزدا العاش رەت زاماناۋي اۋەندى ورىنداعان مەن بولاتىنمىن. 1999 -جىلى حالىقارالىق «ازيا داۋسى» فەستيۆالىندە قىلقوبىزدى ەستراداعا وڭدەپ، حالىقتىڭ الدىندا ونەر كورسەتتىم. 2008 -جىلى ەسترادالىق باعىتتاعى ەكى بىردەي ءۇنتاسپام شىقتى. 2005, 2009, 2013 ج  ءوزىمنىڭ جەكە كونتسەرتىمدى بەردىم. ءبىرىنشى بولىمىندە ءداستۇرلى، ەكىنشى بولىمىندە ەسترادا باعىتىنداعى كومپوزيتسيالاردى ورىنداعان بولاتىنمىن.

 - جۋىردا «ۇلى دالا دارىنى» اتتى ۇلكەن بايقاۋ بولعالى جاتىر. وسى بايقاۋدا قازىلىق ەتەدى ەكەنسىز. وسىعان توقتالىپ وتسەڭىز.

- 2015 -جىلدان باستاپ «ۇركەر» شىعارماشىلىق ورتالىعى قىزمەت اتقارىپ كەلەدى. سول شىعارماشىلىق ورتالىقتىڭ باستاماسىمەن، يدەياسىمەن وسىنداي بايقاۋ قۇرىلدى. ونىڭ ەرەكشەلىگى - ءۇش كەزەڭنەن تۇراتىندىعىندا. ءبىرىنشى كەزەڭىندە قازاقستاننىڭ تۇكپىر- تۇكپىرىندە تۇراتىن دارىنداردى ىرىكتەيدى. جاقىندا استانا قالاسىندا قازىلىق ەتتىم. 200 گە جۋىق ونەرپاز ءوز ونەرىن پاش ەتتى. كوپشىلىگى اقپان ايىنىڭ 17-18 سىندە باستالاتىن ەكىنشى كەزەڭگە جولداما الدى.