پرەزيدەنت ۇكىمەتكە «سيفرلىق قازاقستان» باعدارلاماسىن ازىرلەۋدى تاپسىردى

استانا. قازاقپارات - مەملەكەت باسشىسى نۇرسۇلتان نازاربايەۆ ءوزىنىڭ ەل حالقىنا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا ۇكىمەتكە «سيفرلىق قازاقستان» جەكە باعدارلاماسىن ازىرلەۋدى تاپسىردى، دەپ حابارلايدى قازاقپارات.

«ءبىز سيفرلىق تەحنولوگيانى قولدانۋ ارقىلى قۇرىلاتىن جاڭا يندۋستريالاردى وركەندەتۋگە ءتيىسپىز. بۇل - ماڭىزدى كەشەندى مىندەت.

ەلدە D3- پرينتينگ، ونلاين- ساۋدا، موبيلدى بانكينگ، سيفرلىق قىزمەت كورسەتۋ سەكىلدى دەنساۋلىق ساقتاۋ، ءبىلىم بەرۋ ىسىندە قولدانىلاتىن جانە باسقا دا پەرسپەكتيۆالى سالالاردى دامىتۋ كەرەك. بۇل يندۋستريالار قازىردىڭ وزىندە دامىعان ەلدەردىڭ ەكونوميكالارىنىڭ قۇرىلىمىن وزگەرتىپ، ءداستۇرلى سالالارعا جاڭا ساپا دارىتتى.

وسىعان وراي، ۇكىمەتكە «سيفرلىق قازاقستان» جەكە باعدارلاماسىن ازىرلەۋدى جانە قابىلداۋدى تاپسىرامىن.

ءبىزدىڭ زاڭنامامىزدى جاڭا جاعدايعا بەيىمدەۋ كەرەك»، - دەدى ەلباسى.

پرەزيدەنت ءمالىم ەتكەندەي، كوممۋنيكاتسيانىڭ دامۋى مەن وپتيكالىق- تالشىقتى ينفراقۇرىلىمعا جاپپاي قولجەتىمدىلىكتى دە قامتاماسىز ەتۋ كەرەك. سيفرلىق يندۋستريانى دامىتۋ باسقا بارلىق سالالارعا سەرپىن بەرەدى. سوندىقتان ۇكىمەت  ІТ  سالاسىن دامىتۋ ماسەلەسىن ەرەكشە باقىلاۋدا ۇستاۋعا ءتيىس.

 سونىمەن قاتار نۇرسۇلتان نازاربايەۆ ۇكىمەتكە «ەكسپو-2017» نىساندارىنىڭ ءبىرىنىڭ بازاسىندا IT- ستارتاپتار حالىقارالىق تەحنوپاركىن قۇرۋدى تاپسىردى.

«ول الەمنىڭ بارلىق ەلىنەن كاسىپكەرلەر مەن ينۆەستورلار تارتۋدىڭ پلاتفورماسى بولۋعا ءتيىس. بۇل ءۇشىن ءتيىستى ينفراقۇرىلىم جانە سالىق جەڭىلدىكتەرىن، وڭايلاتىلعان ۆيزا مەن ەڭبەك رەجىمىن قوسا العاندا، قولايلى جاعداي كەرەك.

ءبىز جوعارى وقۋ ورىندارى، نازاربايەۆ ۋنيۆەرسيتەتى جانە «الاتاۋ» ينننوۆاتسيالىق تەحنولوگيالار پاركى بازاسىندا ءوزىمىزدىڭ عىلىمي جانە يننوۆاتسيالىق الەۋەتىمىزدى دامىتۋىمىز كەرەك.

ەكىنشى كەشەندى مىندەت. جاڭا يندۋستريالار قۇرۋمەن قاتار ءداستۇرلى بازالىق سالالاردى دامىتۋعا سەرپىن بەرۋىمىز كەرەك.

بۇل - ونەركاسىپ، اگروونەركاسىپتىك كەشەن، كولىك پەن لوگيستيكا، قۇرىلىس سەكتورى جانە باسقا سالالار»، - دەدى ول.

اۆتور: گۇلميرا الياكپاروۆا