ۇكىمەتكە جاڭا ستراتەگيالىق جوسپار قۇرۋ مىندەتى جۇكتەلەدى - پرەزيدەنت

استانا. قازاقپارات - بۇگىن ۇلتتىق تەلەارنالار ارقىلى جىل سايىنعى قازاقستان حالقىنا ارنالعان جولداۋىنا قاتىستى مالىمدەمە جاساعان مەملەكەت باسشىسى نۇرسۇلتان نازاربايەۆ ۇكىمەتكە ارنايى ستراتەگيانى ازىرلەۋدى تاپسىردى، دەپ حابارلايدى قازاقپارات ءتىلشىسى.

پرەزيدەنتتىڭ ايتۋىنشا، بيىلعى جولداۋدا بيزنەس، اۋىل شارۋاشىلىعى، كولىك پەن لوگيستيكا، تۇرعىن ءۇي ماسەلەسى دە نازاردان تىس قالمادى. ءبىلىم بەرۋ، دەنساۋلىق ساقتاۋ مەن حالىقتى الەۋمەتتىك قورعاۋ سالاسىن دامىتۋ شارالارى دا كورسەتىلگەن.

«ۇكىمەتكە ەلدى جاڭعىرتۋدىڭ ءۇشىنشى كەزەڭى بويىنشا «قازاقستاننىڭ ۇلتتىق- تەحنولوگيالىق باستاماسى - قازىرگى زاماننىڭ قاۋىپ- قاتەرلەرىنە توتەپ بەرۋ جولى» اتتى 2025 -جىلعا دەيىنگى ستراتەگيالىق جوسپاردى ازىرلەۋ مىندەتى جۇكتەلەدى. وسىعان بايلانىستى ۇكىمەت مۇشەلەرىنە جاقسىلاپ جۇمىس ىستەۋگە تۋرا كەلەدى. مىندەتتەر ناقتى ءارى ايقىن، ماڭىزى دا زور. ول ءۇشىن ماماندار بار، ينفراقۇرىلىم بار، ءتيىستى مەملەكەتتىك ورگاندار بار. قۇزىرەتتى مينيسترلىكتەر ءوز دەڭگەيىندە بارلىق شارالاردىڭ اتقارىلۋىن قامتاماسىز ەتۋى كەرەك. وسىنىڭ ءبارى ەكونوميكانىڭ ءوسۋىن ۇزارتادى. جاقىندا ەلىمىزدىڭ ساياسي جاڭعىرۋىنىڭ جوباسى جاريالانعان بولاتىن. وسى باستامالار ءبىرىن- ءبىرى تولىقتىرىپ، قازاقستاننىڭ ۇزاقمەرزىمدى دامۋىن كوزدەيدى. وسىلايشا ءبىز «ستراتەگيا - 2050» - ءدىڭ باستى ماقساتى - قازاقستاننىڭ دامىعان 30 مەملەكەتتىڭ قاتارىنا ەنۋىنە جەتە الامىز»، - دەدى نۇرسۇلتان نازاربايەۆ.

ءوز سوزىندە مەملەكەت باسشىسى حالىقتىڭ اتالعان باستامالاردى قولدايتىنىنا سەنىم ءبىلدىردى.

اۆتور: ارمان اسقاروۆ