ديماش قۇدايبەرگەنوۆ قىتايدىڭ مەرەكەلىك كونسەرتىندە ونەر كورسەتتى

استانا. قازاقپارات - قازاقستاندىق ءانشى ديماش قۇدايبەرگەنوۆ حۋنان تەلەارناسىنىڭ قىتايدىڭ كوكتەم مەرەكەسىنە (قىتايدىڭ جاڭا جىلى) ارنالعان كونسەرتكە قوناق بولىپ ونەر كورسەتتى،

 دەپ حابارلايدى قازاقپارات ءتىلشىسى.

ديماش ساحناعا: «اسسالاۋماعالايكۋم اعايىن، جاڭا جىل قۇتتى بولسىن!»، - دەپ شىقتى. سونداي- اق، «وپەرا 2» انىمەن قىتايلىق كورەرمەندەردى تاعى دا ءتانتى ەتىپ، مەرەكەلىك كوڭىل- كۇي سىيلادى.

قىتايدىڭ كونە كۇنتىزبەسى بويىنشا بيىل قىتاي جاڭا جىلى 12 - قاڭتار مەن 19 - اقپان ارالىعىندا تويلانادى. وسى ۋاقىت جىل باسىنداعى جاڭا تۋعان ايعا سايكەس كەلەدى. گرەگوريان كۇنتىزبەسى ەنگىزىلگەننەن كەيىن بۇل مەرەكەنى باتىستىق جاڭا جىلدان اجىراتۋ ءۇشىن «كوكتەم مەرەكەسى» دەپ اتايتىن بولدى.

ايتا كەتەرلىگى، وتانداسىمىز حۋنان تەلەارناسىنىڭ «Singer2017» ءان بايقاۋىنا قاتىسىپ جاتىر. بۇعان دەيىن ءانشىنىڭ بايقاۋداعى ءساتتى ونەرى تۋرالى حابارلاعان بولاتىنبىز. ءانشىنىڭ تالانتىنا تاڭ- تاماشا بولعان قىتايلىقتاردىڭ قاراسى كوبەيىپ، ونىڭ Sina Weibo (تۋيتتەردىڭ بالاماسى) ميكروبلوگىنا جازىلۋشىلاردىڭ سانى 1 ميلليون 200 مىڭنان اسىپ كەتكەن.

اۆتور: مۇحتار قاليموللا ۇلى