تىنىق مۇحيتتىڭ ۇستىندە جولاۋشى ۇشاق ەسىگىن اشپاققا ارەكەتتەندى

استانا. قازاقپارات - اۆستراليانىڭ Qantas اۋە كومپانياسىنىڭ جولاۋشىسى تىنىق مۇحيتى ۇستىنەن ۇشىپ بارا جاتقان لاينەر سالونىنان شىعۋعا ارەكەتتەندى، دەپ حابارلايدى The Advertiser.

وقيعا لوس- اندجەلەستەن سيدنەيگە باعىت العان رەيستەردىڭ بىرىندە بولعان. قونۋعا 1 ساعات قالعاندا 49 جاستاعى ا ق ش ازاماتى مانۋەل گونسالەس (Manuel Gonzalez) 12 مىڭ مەتر بيىكتىكتە ۇشىپ بارا جاتقان ۇشاقتىڭ ەسىگىن اشۋعا ارەكەتتەنگەن. ونى ورنىنا وتىرعىزىپ، ۇشاق جەرگە قونعانشا ءتورت اۋە جولسەرىگى كۇزەتكەن. ۇشاق جەرگە قونعان سوڭ، ەكيپاج گونسالەستى پوليسياعا تاپسىردى.

 جولاۋشىعا اۋە كەمەسىنە قاۋىپ توندىرەتىن ارەكەتكە باردى دەگەن ايىپ تاعىلدى. گونسالەس 10 جىلعا دەيىن باس بوستاندىعىنان ايىرىلۋى مۇمكىن. سوت 15 ناۋرىزعا بەلگىلەنىپ وتىر.