ايزا يمابەك، مانەرلەپ سىرعاناۋشى: ۋنيۆەرسيادادا قازاقتىڭ كۇيىنە بيلەيمىن
- ايزا، ءسىزدى الماتىدان ىزدەپ تابا المادىق. ەل چەمپيوناتىنان سوڭ شەتەلدە جاتتىعىپ ءجۇرسىز بە؟
- دۇرىس ايتاسىز. جاقىندا ۋنيۆەرسيادا نىسانى سانالاتىن «الماتى ارەنادا» وتكەن ەل چەمپيوناتىندا كۇمىس جۇلدەگەر اتاندىم. وسىدان سوڭ، جاتتىعۋىمدى قايتادان پىسىقتاۋ ماقساتىمەن رەسەيدى بەتكە الدىم. بۇل كۇندەرى سانكت- پەتەربۋرگ قالاسىندا جاتتىعىپ ءجۇرمىز. مۇندا ۋنيۆەرسيادا قاتىسۋشىلارىنىڭ كۇنىنە 3 ساعات تەگىن جاتتىعۋىنا مۇمكىندىك بار. قىسقى ۋنيۆەرسيادانى ۇيىمداستىرۋشىلارعا مۇنداي مۇمكىندىك سىيلاعانى ءۇشىن راحمەت ايتامىن. پەتەربۋرگتە كۇن سايىن مۇزدا سىرعاناپ، ءادىس- تاسىلدەرىمىزدى ودان ءارى جەتىلدىرىپ، جالپى دەنە جاتتىعۋىن جاساپ جاتىرمىز.
- ءسىزدىڭ باپكەرىڭىز تۋرالى كوپ اقپارات جوق. ۋنيۆەرسياداعا كىمنىڭ قول استىندا دايىندالىپ ءجۇرسىز؟
- بۇگىندە ولەگ تاتۋروۆ اتتى بىلىكتى مامان مەنىڭ جەكە جاتتىقتىرۋشىم بولىپ سانالادى. ول مانەرلەپ سىرعاناۋ سپورتىنداعى داڭقتى باپكەر الەكسەي ءميشيننىڭ شاكىرتى. ال الەكسەي ءميشيننىڭ مانەرلەپ سىرعاناۋ سپورتىندا ەۆگەنيي پليۋشەنكونىڭ جۇلدىزىن جاققانىن بىلەسىزدەر. مىنە، ولەگ مىرزا مەنىڭ ۋنيۆەرسياداعا ارنالعان باعدارلامامدى دايىنداپ، ءوز ەلىمدەگى دودادا جاقسى ونەر كورسەتۋ ءۇشىن بارىن سالىپ جاتىر.
- قۇپيا بولماسا، قىسقى ۋنيۆەرسياداعا قانداي باعدارلاما دايىنداپ جاتىرسىز؟
- ۋنيۆەرسياداعا دايىنداعان باعدارلامام تۋرالى ءالى ەشكىمگە ءتىس جارىپ ايتپاعان ەدىم. دەگەنمەن، جانكۇيەرلەرىمە جاريالاي بەرەتىن ۋاقىت كەلدى. بۇگىندە ەكى باعدارلاما دا تولىعىمەن دايىن. قىسقا باعدارلامادا مەن تانگو اۋەنىنە قويىلعان ءبيىمدى ورىندايمىن. ال ەركىن باعدارلامادا ءار قازاقتىڭ رۋحىن اسقاقتاتىپ جىبەرەتىن «كوروعلى» كۇيىنىڭ اۋەنىمەن ايدىنعا شىعامىن. ۋنيۆەرسياداعا كيىپ شىعاتىن كوستيۋمدەرىم قۇپيا كۇيىندە قالسىن. «الماتى ارەناعا» كەلەتىن جانكۇيەرلەرىم ءۇشىن ول توسىن سىي بولماق.
- كوپتەگەن سپورتشىلار ءۇشىن ءوز جانكۇيەرلەرىنىڭ الدىندا ونەر كورسەتۋ وڭاي ەمەس. ال سىزگە ءوز ەلىڭىزدە ونەر كورسەتۋ ۇلكەن جاۋاپكەرشىلىك جۇگىن ارتپاي ما؟
- ارينە، قوبالجىپ جۇرگەنىمدى جاسىرمايمىن. بۇكىل الەم كوز تىگەتىن دوداعا العاش رەت قاتىسقالى وتىرمىن. ونىڭ ۇستىنە، ءوز جانكۇيەرلەرىمنىڭ الدىندا ەلىمىزدىڭ نامىسىن ابىرويمەن قورعاعىم كەلەدى. ماقسات - جالعىز. بار كۇشىمدى، مانەرلەپ سىرعاناۋ سپورتىنداعى بارلىق تاجىريبەمدى سالىپ، جوعارى ۇپاي جيناۋعا تىرىسامىن. جالپى، ماعان ءوز جەرىمدە، ءوز حالقىمنىڭ الدىندا ونەر كورسەتكەن ۇنايدى. بۇل مەنى ودان ءارى قاناتتاندىرا تۇسەدى.
- ۋنيۆەرسيادا كەزىندە ءسىزدىڭ ەڭ باستى جانكۇيەرلەرىڭىز كىم بولادى؟
- ءبىرىنشى كەزەكتە - اتا- انام. مەنى وسى دەڭگەيگە جەتكىزىپ، كىشكەنتاي كەزىمنەن ماپەلەپ، مانەرلەپ سىرعاناۋعا باۋلىعان اكەم مەن انام بولاتىن. قانشاما قيىندىق كەزدەسسە دە، بارلىق قاراجاتىن مەنىڭ جاتتىعۋىما تولەپ، قىزدارىنىڭ سپورت كوگىندە جۇلدىز بولعانىن قالادى. سول ءۇشىن اتا- اناما العىسىم شەكسىز. ودان بولەك، ەڭ ماڭىزدى ساتتە دوستارىم مەن جاقىندارىم جانە حالقىم مەنى قولداۋسىز قالدىرمايدى دەپ ويلايمىن.
- الماتىداعى دودادا ءسىزدى ۇزدىكتەر قاتارىنان كورە الامىز با؟
- ەگەر ءبارىن ءساتتى ورىنداپ، بارلىق ادىستەرىمدى ءمىنسىز اتقارسام، جۇلدەگە ىلىنەمىن دەگەن ارمانىم بار
- ۋنيۆەرسياداعا قاي جوعارى وقۋ ورنىنىڭ اتىنان قاتىساسىز؟
- مەن وتكەن جىلى قازاقتىڭ سپورت جانە تۋريزم اكادەمياسىنىڭ ستۋدەنتى اتاندىم. تيىسىنشە، ۋنيۆەرسياداعا سول وقۋ ورنىنىڭ اتىنان قاتىسامىن.
- ءسوز سوڭىندا ۋنيۆەرسياداعا ارنايى سالىنعان سپورتتىق نىساندار تۋرالى پىكىرىڭىزدى بىلگىمىز كەلەدى. ويتكەنى، ءسىز «الماتى ارەنانىڭ» مۇز ايدىنىندا سىرعاناپ ۇلگەردىڭىز...
- شىنىمدى ايتسام، «الماتى ارەنا» مەن «حالىق ارەنا» ماعان وتە ۇنادى. شەتەلدەگى مۇز ايدىندارىنان اسىپ تۇسپەسە، كەم ەمەس. ءبىز مۇندا ءبىراز جاتتىعۋ وتكىزدىك. كوڭىلىمنەن شىقتى.
- اڭگىمەڭىزگە راحمەت!
universiada.nur.kz
