مەملەكەت باسشىسى ۋنيۆەرسيادانىڭ ەڭ باستى پايداسى تۋرالى ايتتى

استانا. قازاقپارات - مەملەكەت باسشىسى نۇرسۇلتان نازاربايەۆتىڭ ايتۋىنشا، الماتىدا باستالعان ۋنيۆەرسيادا ويىندارىنىڭ پايداسى ۇلتىمىزدىڭ دەنساۋلىعىن نىعايتا الاتىن مەملەكەتتىك باعدارلامامەن پارا-پار، دەپ حابارلايدى قازاقپارات ءتىلشىسى.

«ۋنيۆەرسيادا ويىندارىن وتكىزۋ ءۇشىن الماتىنى بەكەر تاڭداعانىمىز جوق. الماتى - مىڭ جىلدىق تاريحى بار قالا، تاۋەلسىزدىگىمىزدىڭ تال بەسىگى، ويتكەنى، دال وسى الماتى قالاسىندا ەگەمەندى ەل بولعانىمىزدى جاريالاعان ەدىك. بۇل شاھاردا قازاقستاننىڭ جاڭا ءداۋىرى باستالدى. الماتى - قارقىندى دامۋشى، زاماناۋي قالا، ەل ەكونوميكاسىنىڭ قوزعالتقىشى جانە ىسكەرلىك ورتانىڭ مەكەنى.

بۇل - جاستاردىڭ قالاسى، ستۋدەنتتەردىڭ قالاسى، بۇل قالادا قازاقستانداعى ۋنيۆەرسيتەتتەردىڭ ۇشتەن ءبىرى ورنالاسقان. الماتىدا 137 مىڭ ستۋدەنت ءبىلىم الىپ ءجۇر»، - دەدى پرەزيدەنت ۋنيۆەرسيادانىڭ اشىلۋ سالتاناتىندا ءسوز الا وتىرىپ.

ەلباسى اتاپ وتكەندەي، ۋنيۆەرسيادانىڭ ارقاسىندا اتاقتى «مەدەۋ» مۇز ايدىنى جاڭا كەلبەتكە ەنەدى. «شىمبۇلاق» بولسا، ىلە الاتاۋ بوكتەرىندەگى «المازقا» اينالادى. «ۋنيۆەرسيادا ويىندارىنىڭ پايداسى ۇلتىمىزدىڭ دەنساۋلىعىن نىعايتا الاتىن مەملەكەتتىك باعدارلامامەن پارا- پار.

اتاقتى عالىم اندجەللو موسسو «سپورت جۇزدەگەن ەمنەن ارتىق، ءبىراق، ەشبىر ەم سپورتتاي بولا المايدى» دەپ بەكەر ايتپاعان. بۇل - وتە دۇرىس ايتىلعان ءسوز»، - دەدى پرەزيدەنت.
ايتا كەتەيىك، كەشە الماتىدا 28- دۇنيەجۇزىلىك قىسقى ۋنيۆەرسيادا ويىندارىنىڭ اشىلۋ سالتاناتى ءوتتى. شاراعا قاتىسقان ق ر پرەزيدەنتى جاستار سايىسىنا 57 ەلدەن 2 مىڭنان استام سپورتشى، مىڭداعان سپورت مامانى مەن جانكۇيەر قاتىسىپ جاتقانىن اتاپ ءوتتى. اشىلۋ راسىمىندە سپورتشىلار شەرۋىن 28- ۋنيۆەرسيادانىڭ يەسى - قازاقستان قۇراماسى اياقتادى.

ەلىمىزدىڭ بايراعىن شاڭعىشى داۋلەت راحىمبايەۆ الىپ ءجۇردى. ەل نامىسىن بارلىعى 175 سپورتشى قورعايدى.

اۆتور: كەنجەكەي توقتامۇرات قىزى