پرەزيدەنت قازاقستان ۋنيۆەرسياداعا بەس جىل دايىندالعاندىعىن ايتتى
«ەلىمىزگە كەلگەن قۇرمەتتى قوناقتار، سپورتشىلار مەن جانكۇيەرلەر. ۋنيۆەرسيادانىڭ اشىلۋ كۇنىنە دەيىن ءبىز بەس جىل دايىندالدىق، بۇل بەس جىلدىق جول ءبىزدى قايراتتاندىرا ءتۇستى، ورتاق ماقساتقا جۇمىلدىرىپ، الماتى سياقتى مەگاپوليستىڭ كەلبەتىن وزگەرتتى»، - دەدى پرەزيدەنت.
سونداي-اق، نۇرسۇلتان نازاربايەۆ ۋنيۆەرسيادانى ۇيىمداستىرۋعا قولداۋ كورسەتكەن حالىقارالىق ستۋدەنتتىك سپورت فەدەراتسياسىنا جانە ونىڭ پرەزيدەنتى ولەگ ماتىتسينعا تىكەلەي العىسىن جەتكىزدى. «وسى جاھاندىق مەرەكەنىڭ دايىندىعىنا قاتىسقانداردىڭ بارلىعىنا، سونىڭ ىشىندە، قازاقستاننىڭ ءۇش مىڭعا تارتا جاس ەرىكتىلەرىنە العىس ايتامىز. وسى ستاديوندا الەمنىڭ جۇزدەگەن وقۋ ورنىنان ستۋدەنتتەر كەلىپ، باق سىناعالى وتىر. ءبىز سەندەردىڭ ارالارىڭدا بولاشاق وليمپيادا چەمپيوندارى مەن الەم سپورتىنىڭ جۇلدىزدارى بار دەپ سەنەمىز»، - دەدى ەلباسى.
ايتا كەتەيىك، الماتىدا 28- دۇنيەجۇزىلىك قىسقى ۋنيۆەرسيادا ويىندارىنىڭ اشىلۋ سالتاناتى ءوتتى. شاراعا قاتىسقان ق ر پرەزيدەنتى جاستار سايىسىنا 57 ەلدەن 2 مىڭنان استام سپورتشى، مىڭداعان سپورت مامانى مەن جانكۇيەر قاتىسىپ جاتقانىن اتاپ ءوتتى. اشىلۋ راسىمىندە سپورتشىلار شەرۋىن 28- ۋنيۆەرسيادانىڭ يەسى - قازاقستان قۇراماسى اياقتادى. ەلىمىزدىڭ بايراعىن شاڭعىشى داۋلەت راحىمبايەۆ الىپ ءجۇردى. ەل نامىسىن بارلىعى 175 سپورتشى قورعايدى.
اۆتور: كەنجەكەي توقتامۇرات قىزى
