ۋنيۆەرسيادانىڭ اشىلۋى: سپورتشىلار شەرۋىندە قازاق تۋىن داۋلەت راحىمبايەۆ الىپ ءجۇردى - فوتو
الەمنىڭ 57 ەلىنەن كەلگەن سپورتشىلار سالتاناتتى شەرۋمەن ءجۇرىپ ءوتتى، دەپ حابارلايدى قازاقپارات ءتىلشىسى. ويىندارعا ەڭ كوپ سپورتشىلار قىتاي، كانادا، رەسەي ەلدەرىنەن كەلدى. سپورتشىلار شەرۋىن 28- ۋنيۆەرسيادانىڭ يەسى - قازاقستان قۇراماسى اياقتادى. ەلىمىزدىڭ بايراعىن شاڭعىشى داۋلەت راحىمبايەۆ الىپ ءجۇردى. ەل نامىسىن بارلىعى 175 سپورتشى قورعايتىن بولادى. سالتاناتتى شەرۋمەن بارلىعى 57 ەلدىڭ قۇرامالارى ءجۇرىپ ءوتتى. 29 -قاڭتار مەن 8 -اقپان ارالىعىندا الماتىدا وتەتىن 2017 -جىلعى قىسقى ۋنيۆەرسيادا ويىندارىندا 2 مىڭعا جۋىق سپورتشى باق سىنايدى.
جارىستى ۇيىمداستىرۋعا 3 مىڭ ەرىكتى جۇمىلدىرىلدى (شەت ەلدەر مەن قازاقستاننىڭ ءار وڭىرىنەن). ويىندارعا 30 مىڭعا جۋىق شەتەلدىك قوناق پەن تۋريست كەلەتىنى كۇتىلۋدە. ال تەلەارنالار ارقىلى 80 ەلدەن 1 ميلليارد ادام تاماشالاماق. ستۋدەنتتەر 12 سپورت تۇرىنەن باق سىنايتىن بولادى: بياتلون، شاڭعى سپورتى، كەرلينگ، كونكي سپورتى، شاڭعى قوسسايىسى، شاڭعىمەن جارىس، شاڭعىمەن تۇعىردان سەكىرۋ، سنوۋبورد، مانەرلەپ سىرعاناۋ، فريستايل، شايبالى حوككەي، شورت-ترەك.
جارىستار وتەتىن نىساندار: «شىمبۇلاق» تاۋ- شاڭعى شيپاجايى، «مەدەۋ» سپورت كەشەنى، «سۇڭقار» شاڭعى ترامپليندەر كەشەنى، ب. شولاق اتىنداعى سپورت جانە مادەنيەت سارايى، «الاتاۋ» شاڭعى- بياتلون كەشەنى، مۇز سارايى، مۇز ارەناسى جانە الماتىنىڭ ورتالىعىنداعى ۋاقىتشا سپورت كەشەنى، «تاباعان» سپورتتىق- ويىن، ساۋىق كەشەنى. ۋنيۆەرسيادا تاريحىندا تۇڭعىش رەت سپورتشىلار ءۇشىن اتلەتتەر قالاشىعى جاساقتالدى.
كەشە ب ا ق وكىلدەرىمەن كەزدەسكەن حالىقارالىق ستۋدەنتتەر سپورتى فەدەراتسياسىنىڭ (FISU) پرەزيدەنتى ولەگ ماتىسين 2017 -جىلعى قىسقى ۋنيۆەرسيادا جوعارى وقۋ ورىندارىنىڭ سانى جاعىنان رەكوردتىق كورسەتكىشكە جەتكەندىگىن مالىمدەگەن بولاتىن. قازاقستان ۋنيۆەرسياداعا 1993 -جىلدان بەرى قاتىسىپ كەلەدى. وسى جىلدار ىشىندە سىنعا تۇسكەن 700 سپورتشى 125 مەدال ەنشىلەدى. قازاقستاندىق سپورتشىلار ءۇشىن 2015 -جىلعى قىسقى ۋنيۆەرسيادا ەڭ ناتيجەلى بولدى. قۇراما ءبىرىنشى رەت جالپى ەسەپتە 3- ورىن الدى (5 «التىن»، 6 «كۇمىس»).
اۆتور: الماس مۇقاش ۇلى
