حالىق قالاۋلىلارى وزدەرىنە جۇكتەلگەن جاۋاپكەرشىلىكتى ايقىن سەزىنەتىن كەز كەلدى - ب. ءجانادىلوۆ
بۇل تۋرالى «قازاقپارات» ح ا ا تىلشىسىنە بەرگەن سۇحباتىندا كوكشەتاۋ قالاسىنىڭ قۇرمەتتى ازاماتى، دەنساۋلىق ساقتاۋ سالاسىنىڭ ارداگەرى بولات ءجانادىلوۆ ايتتى.
ونىڭ ايتۋىنشا، ەلىمىزدە بيلىك وكىلەتتىكتەرىن ءبولىسۋ رەفورماسى دەر كەزىندە قولعا الىنىپ وتىر. «مەملەكەت باسشىسى نۇرسۇلتان نازاربايەۆ مەملەكەت دامۋىنىڭ كەلەسى بەلەسىنە دەر كەزىندە جول اشىپ بەردى. راسىندا دا بىزگە بەدەلدى پارلامەنت، حالىققا ەسەپ بەرىپ وتىراتىن ۇكىمەت كەرەك. ساياسي رەفورما حالىقتىڭ تالقىلاۋىنا ۇسىنىلىپ وتىر. بۇل دەموكراتيالىق جولدى تاڭداعان ەل ءۇشىن ماڭىزدى قادام. شىنىن ايتۋ كەرەك، ءبىز بۇل ۇندەۋدى مۇقيات زەردەلەپ، وي ەلەگىنەن وتكىزدىك. وي ەلەگى عانا ەمەس، جۇرەك تەبىرەنىسى، كەلەشەك كۇندەرگە دەگەن جاۋاپكەرشىلىكتىڭ بيىك جوتاسىنان باعامداۋ دەپ ايتساق تا بولار.
ءيا، زامان ديدارى وزگەرۋگە ءتيىس. سونىمەن بىرگە، مەملەكەتتىك باسقارۋ جۇيەسىن دە تۇبەگەيلى جاڭعىرتاتىن كەزدىڭ كەلگەنى دەپ تۇسىنۋگە ءتيىسپىز. مۇنىڭ ءوزى ەڭ الدىمەن جالپاق جۇرتتىڭ مۇددەسى، زىمىران زاماننىڭ ايقىن تالابى، سونىمەن بىرگە، اينالىپ كەلگەندە كەلەر ۇرپاقتىڭ كەلەشەگىن ويلاۋ دەپ ايتۋعا ابدەن بولادى. مەنىڭشە وسى رەفورما اياسىندا ۇكىمەتتى جاساقتاۋداعى پارلامەنتتىڭ ءرولى بارىنشا كۇشەيەدى. تيىسىنشە مينيسترلەر كابينەتى ءوز جاۋاپكەرشىلىگىن ارتتىرا تۇسەدى. قاراپايىم تىلمەن ايتقاندا بيلىكتىڭ زاڭ شىعارۋشى تارماعىنىڭ اتقارۋشى بيلىككە باقىلاۋىن كۇشەيتەدى»، دەيدى ب. ءجانادىلوۆ.
سونىمەن قاتار، ول دۇنيەجۇزىندە ورىن الىپ وتىرعان ساياسي، ەكونوميكالىق داعدارىس كەزىندە ەل بيلىگى ەلدەگى ناقتى جاعدايدى كوزبەن كورىپ دۇرىس شەشىم قابىلداۋعا ءبىرتابان جاقىندايتىنىن ايتۋدا.
«بۇگىن الەم ۇلى وزگەرىستەر ۇدەرىسىندە. سوندىقتان دا جاڭاشا شەشىم، سونى جۇيە قاجەت- اق. مەملەكەت باسشىسى ەندىگى ارادا سىرتقى ساياساتقا، ۇلتتىق قاۋىپسىزدىك پەن ەلدىڭ قورعانىسىن نىعايتۋعا كۇش- جىگەرىن جۇمىلدىرادى. وسى ورايدا، ۇكىمەت پەن پارلامەنتتىڭ ءرولى نىعايا تۇسەدى. اسىرەسە، حالىق قالاۋلىلارى وزدەرىنە جۇكتەلگەن جاۋاپكەرشىلىكتى ايقىن سەزىنەتىن ۋاقىت كەلدى»، دەپ ءسوزىن قورىتتى كەيىپكەرىمىز.
