بىشكەكتە ۇرىلار ءۇش ايەلدى تەپكىنىڭ استىنا العان ءسات كامەراعا ءتۇسىپ قالعان - كەسكىن

 استانا. قازاقپارات - بىشكەكتەگى دۇكەندەردىڭ بىرىندە بەلگىسىز بىرەۋلەر ءۇش ايەلدى اياۋسىز ۇرىپ، توناپ كەتتى.

شابۋىل ءساتى بەينەباقىلاۋ كامەرالارىنا ءتۇسىپ قالعان، دەپ حابارلايدى قىرعىزستاننىڭ Sputnik اگەنتتىگى. زارداپ شەككەن ايەلدەردىڭ ءبىرىنىڭ تانىسى وقيعانىڭ 2016 -جىلدىڭ 22 -جەلتوقسان كۇنى كەشقۇرىم ورىن العانىن ايتقان. ونىڭ ايتۋىنشا، ايەل ساۋدا ءتۇسىمىن الۋعا كەلگەندە، دۇكەنگە بەلگىسىز ءۇش ادام كىرەدى. قاسكۇنەمدەر ءۇش ايەلگە شابۋىل جاساپ، 40 مىڭ سومدى الىپ كەتەدى.

قۇقىق قورعاۋ ورگاندارى قىلمىسكەرلەردى تابا الماعان. «ارىزدى سول كۇنى كەشكىسىن ساعات 23:00 شاماسىندا جازدىق. ميليتسيونەرلەر كەلىپ، ستاقانداردى جينادى. ءبىراق، ساۋساق ىزدەرىن المادى، ولاردىڭ انىق ەمەس ەكەندىگىن ايتتى. الايدا، تاسپادا كورىنىپ تۇرعانداي، ولار ءىزتاڭبالار الۋعا بولاتىنداي كوپ زاتتاردى ۇستاعان ەدى. قاسكۇنەمدەردى سول قالپى تاپپادى، ءبىر اي بويى وتىرىك ۋادە بەرىپ، الداپ كەلدى»، - دەپ مالىمدەدى ەر كىسى.

ونىڭ ايتۋىنشا، ءۇش ايەلدىڭ تەك بىرەۋى قاتتى جاراقات العان. «ولاردىڭ بارلىعىنىڭ جاعدايى قازىر جاقسى. تەپكىنىڭ استىندا قالعان ايەل سوققىدان جاقسى قورعانعان - ونىڭ دەنەسىندە تەك جارالار قالدى. ال، تاعى ءبىر ايەلدى كوك الا قويداي ەتىپ ساباعان، ونىڭ بەتى كوگەرىپ كەتكەن»، - دەپ حابارلادى زارداپ شەگۋشىنىڭ تانىسى.

اگەنتتىك شۋ وبلىستىق ءى ءى ب- مەن بايلانىسقان. باسقارمادا حابارلانعانداي، الامەدى ا ءى ءى ب- دا قىرعىزستان رەسپۋبليكاسى قىلمىستىق كودەكسىنىڭ 168-بابى «توناۋ» بويىنشا قىلمىستىق ءىس قوزعالدى. ءبىراق قىلمىسكەرلەر ءالى انىقتالماعان، ىزدەستىرۋ جۇمىستارى جۇرگىزىلۋدە.