جۇمىسشىلارىن قىسقارتۋدى توقتاتپايتىن قىتايلىق «ۇلى قورعان» مۇناي كومپانياسىن جابامىز - ساپاربايەۆ

قازىر 946 ادام تىزىمدە بولسا، ونىڭ تەڭ جارتىسى اقىسىز دەمالىسقا شىعارىلعان. بۇگىن 2016 -جىلدىڭ قورىتىندىسى تىڭدالىپ، ءىرى مۇناي كومپانيالارىنىڭ تاپسىرىسىن قابىلداپ، بۇرعىلاۋ جۇمىستارىن جۇرگىزەتىن «ۇلى قورعان» كومپانياسى مەن كاسىپوداق، اكىمدىك ءۇشجاقتى مەموراندۋمعا قول قويۋى ءتيىس بولاتىن.
وبلىس اكىمى بەردىبەك ساپاربايەۆ ءىس جۇزىندە ورىندالمايتىن مەموراندۋمعا قول قويۋدان باس تارتىپ، كەلىسىمشارتتى ورىندامايتىن مۇناي كومپانياسىن جابۋدى ۇسىندى، دەپ حابارلايدى «قازاقپارات» ءتىلشىسى. «ۇلى قورعان» كومپانيا سوڭعى جىلدارى تەك شىعىنعا باتىپ وتىر. قۇرىلتايشىلاردان دا قايران جوق. ولار سوڭعى جىلى 100 ميلليون دوللار ينۆەستيتسيا قۇيعانىمەن، ءبارى قارىزدى جابۋعا جۇمسالعان. بۇگىن كومپانيانىڭ باس ديرەكتورى چجان تسحيۋان جۇمىسشىلار مەن كاسىپوداق، اقتوبە وبلىسىنىڭ اكىمى بەردىبەك ساپاربايەۆتىڭ الدىندا ەسەپ بەردى.
جىل قورىتىندىسى ءماز ەمەس. «كومپانيادا 946 جۇمىسشى بار. ونىڭ 855 ى قازاقستاندىق، 66 ى قىتايلىق جۇمىسشى. قازىرگى ۋاقىتتا 25 ايەل بالا كۇتىمىمەن ۇيلەرىندە وتىر. ايتا كەتسەم، 2016 -جىلى كومپانيا تابىسى 4 ميلليارد 600 ميلليون تەڭگەنى قۇرادى. تابىستىڭ 30 پايىزى جالاقى تولەۋگە جۇمسالدى. سوندىقتان، قازىر 393 جۇمىسشى اقىسىز دەمالىسقا جىبەرىلگەن»، - دەدى كومپانيانىڭ باس ديرەكتورى جان شحيۋان. «ۇلى قورعان» ج ش س- ى مۇناي باعاسىنىڭ ارزانداپ، نارىقتاعى بۇرعىلاۋ جۇمىستارىنا تاپسىرىس بەرۋشىلەردىڭ تومەندەۋى كەزىندە جۇمىسشىلارىن قىستارتۋ جولىمەن كومپانيانى ساقتاپ وتىر.
وبلىستىق كاسىپوداق، اكىمدىك پەن كومپانيا اراسىندا وتكەن جىلى 10 تالاپتان تۇراتىن مەموراندۋمعا قول قويىلسا، ونىڭ التى تارماعى بويىنشا مىندەتتەر ورىندالماعان. باستى تالاپ - جۇمىسشىلار سانىن ساقتاپ قالۋ. بۇل تالاپتى ورىنداۋعا كومپانيانىڭ كۇشى جەتپەدى. «وتكەن جىلى جىبەرگەن كەمشىلىكتەردەن كومپانيا باسشىلىعى ناتيجە شىعارعان جوق. كومپانيا باسشىلىعى تەك اقتوبەدەن ەمەس، كورشى اتىراۋ، قىزىلوردا، باتىس قازاقستان، ماڭعىستاۋ وڭىرلەرىنە بارىپ، جۇمىس تابۋى قاجەت ەدى. اكىمدىك تاراپىنان كومەك قاجەت بولسا، كەلىسىمگە دايىن بولدىق. ۇكىمەتتە دە وتىرىس بولدى.
نارىقتاعى مۇناي باعاسى تۇراقتالعان سوڭ قۇرىلتايشىلار مەن «سنپس- اقتوبەمۇنايگاز» ا ق- ى قوسىمشا 23 ميلليون دوللار ينۆەستيتسيا سالىپ، بۇرعىلاۋ جۇمىستارىنا تاپسىرىس بەردى. سول ارقىلى جۇمىسشىلاردى قىسقارتۋ توقتاتىلسىن دەپ ايتىلدى. وكىنىشكە قاراي، جۇمىسشىلاردى قىسقارتۋ توقتاتىلعان جوق. تەك وتكەن جىلى جۇمىسشىلار سانى 60 پايىزعا قىسقاردى. مۇنداي قىسقارتۋ اقتوبەنىڭ بىردە-ءبىر كاسىپورنىندا نەمەسە مەكەمەسىندە بولعان جوق»، - دەدى وبلىس اكىمى بەردىبەك ساپاربايەۆ.
ۇجىمدىق كەلىسىمشارت پەن مەموراندۋمدى ورىنداماعان «ۇلى قورعان» كومپانياسىنىڭ كاسىپوداق ۇيىمى دا سىنعا ىلىكتى. كاسىپوداق جۇمىسشىلاردى ساقتاپ قالۋدى ەمەس، تەك قىسقارتۋعا كەلىسىم بەرۋدى قۇپتاپ كەلگەن.
«جۇمىسشىلاردىڭ قۇقىعىن قورعاۋى ءتيىس كاسىپوداق ۇيىمى ەش ارەكەت ەپتەي وتىر. جۇمىسشىلاردى قورعاي الماسا كاسىپوداق نەگە قاجەت؟ ەگەر وسى جولمەن كەتە بەرسە، كومپانيانى جابۋ كەرەك. بىزگە پروبلەماسى كوپ كومپانيانىڭ قاجەتى جوق. قالعان 948 ادامدى جۇمىسپەن قامتاماسىز ەتە الامىز دەپ ويلايمىن. ءتىپتى، ءقازىر كوپتەگەن كاسىپورىن اشىلىپ جاتىر. بىزدە «ۇلى قورعان» سەرىكتەستىگىنەن باسقا دا جۇمىس بار. قاجەت بولسا، ءبىز كومپانيانى جابامىز. زاڭدى تۇردە جاسالادى»، - دەدى بەردىبەك ساپاربايەۆ.
سونىمەن قاتار، ءوڭىر باسشىسى ءۇشىنشى، ءتورتىنشى دارەجەلى جۇمىسشىلاردى قىتايدان الدىرۋعا تىيىم سالۋدى تاپسىردى. ءتىپتى، قىسقارتۋ بولعان كەزدە قازاقستاندىق، قىتايلىق جۇمىسشىلار تەڭ دارەجەدە تىزىمگە الىنۋىن تالاپ ەتتى. «قاراپايىم جۇمىسشىلاردى قىسقارتقان كەزدە وزدەرىڭدى سول ادامداردىڭ ورنىنا قويۋلارىڭ قاجەت. ولار وتباسىن قالاي اسىرايدى؟ باسشىلارعا، كاسىپوداق جەتەكشىسىنە جاقسى. جۇمىسى بار، ەڭبەكاقىنى ۋاقىتىلى الىپ وتىر. مۇنىڭ ءبارى قارجىگەرلەردىڭ، ەكونوميستەر جۇمىسىنىڭ دۇرىس جۇرگىزىلمەگەنىنەن شىعىپ وتىر. ەگەر تابىس اكەلمەسە، كومپانيانىڭ باعىتىن وزگەرتكەن ءجون. وزگە ەلمەن بايلانىس ورناتۋ قاجەت دەپ ۇسىنىس جاساڭىزدار، كومەكتەسەمىز. ال سىزدەردىڭ تاراپىڭىزدان مۇنداي ۇسىنىس تۇسكەن ەمەس. تەك جۇمىسشىلاردى قىسقارتۋدى بىلەسىڭدەر»، - دەدى بەردىبەك ساپاربايەۆ.
التىناي ساعىندىقوۆا