استانادا جاڭا زيرات قايدا سالىنادى

استانا. قازاقپارات - كەرەگەسى كەڭەيىپ، حالقىنىڭ سانى كوبەيگەن سايىن استانادا جەرلەۋگە ارنالعان ورىنداردىڭ تاپشىلىعى دا انىق بايقالۋدا.

قازىرگى تاڭدا قالانىڭ ورتالىق زيراتتارىندا ورىن جوق دەۋگە بولادى. سوندىقتان قالا بيلىگى جاڭا زيرات سالۋدى قولعا الدى. قالا اكىمىنىڭ ورىنباسارى قوسمان ايتمۇحامەتوۆتىڭ ايتۋىنشا، جاڭادان سالىناتىن قورىمنىڭ جالپى اۋماعى 460,0 گەكتار بولادى.

اتالعان زيرات كوكشەتاۋ قالاسىنا باراتىن اينالما تاس جولدىڭ بويىندا سالىنادى. ءبىرىنشى كەزەكتە پايدالانۋعا بەرىلەتىن زيراتتىڭ اۋماعى 124 گەكتاردى قۇرايدى. ونىڭ 34 گەكتارى مەموريالدىق پارك بولسا، 54 گەكتاردان استامى مۇسىلمانداردى، 36 گەكتاردان استامى حريستياندار مەن وزگە ءدىن وكىلدەرىن جەرلەۋگە بولىنگەن.

سونداي-اق، ەلىمىزگە ەڭبەگى سىڭگەن قايراتكەرلەر مەن اسكەريلەر جەرلەنەتىن ورىندار دا قاراستىرىلادى. اتالعان اۋماقتا مۇسىلماندار مەن پراۆوسلاۆ ءدىن وكىلدەرى ءۇشىن قوشتاسۋ ءۇيىن، اكىمشىلىك- تۇرمىستىق ءىس- شارالار وتكىزەتىن ورىندار اشۋ كوزدەلگەن. سونىمەن قاتار، جەرلەۋ داستۇرىنە سايكەس كەرەك-جاراق ساتاتىن ساۋدا پاۆيلوندارى، ەسكەرتكىشتەر قويماسى مەن قىزمەت كورسەتەتىن ارنايى تەحنيكا قاراستىرىلعان. اكىمدىكتىڭ مالىمەتىنشە، بۇل جۇمىستاردىڭ بارلىعى جەكە ينۆەستور تارتۋ ارقىلى جۇزەگە اسىرىلادى.

قازىرگى كۇنى مارقۇم بولعان مۇسىلماندار الماتى اۋدانىنا قاراستى ينتەرناتسيونالنىي مەن جەلەزنودوروجنىي كەنتىندە جانە الاش تاس جولىنىڭ 9-شاقىرىمىندا ورنالاسقان زيراتتا جەرلەنەدى. ال حريستياندار سارى ارقا اۋدانىنداعى تىلەنديەۆ داڭعىلى مەن ەسىل اۋدانىنىڭ تەلمان كەنتىندە جەر قوينىنا تاپسىرىلىپ كەلگەن. ءبىراق بۇل قورىمداردىڭ كەيبىرىندە ادام جەرلەيتىن ورىن قالماعاندىقتان، جاڭا زيرات سالۋ وزەكتى بولىپ تۇر.

دەرەككوز: «استانا اقشامى گازەتى»