الدا تارتىستى ويىندار كۇتىپ تۇر - ستارىگين
حوككەيدەن قازاقستان ستۋدەنتتەر قۇراماسىنىڭ باس جاتتىقتىرۋشىسى قىتايمەن وتكەن ويىننان كەيىنگى باسپا ءسوز ءماسليحاتىندا كومانداسىن الدا تارتىستى ويىندار كۇتىپ تۇرعانىن ايتتى. تىلشىلەردىڭ سۇراقتارىنا جاۋاپ بەرىپ، شاكىرتتەرىنە كوڭىلى تولاتىنىن تىلگە تيەك ەتتى.
- ۋنيۆەرسيادا ەندى عانا باستالدى. دايىندىعىمىزدى بايقاتتىق. قارسىلاستار ءالسىز شىقتى. ويىن تاماشا ناتيجەمەن اياقتالدى. جىگىتتەر جارادى. قازاقستاندىقتار مەن شاكىرتتەرىمدى جارقىن جەڭىسىمەن قۇتتىقتايمىن. بۇگىن شۆەتسيا مەن ا ق ش اراسىنداعى جولداستىق ويىندى كوردىم. رەسەي، سلوۆاكيا جانە كانادا حوككەيشىلەرى دە قاۋقارلى. الدا تارتىستى ويىندار كۇتىپ تۇر، - دەدى باس جاتتىقتىرۋشى.
ويىن سوڭىنان قىتاي حوككەيشىلەرىن باستاپ كەلگەن جاتتىقتىرۋشى ۋاڭ بەنيۋ دا ءوز ويىن ءبىلدىردى.
- سىزدەردىڭ كوماندالارىڭىز وتە مىقتى. كەلەشەكتە سىزدەردەن ساباق الىپ وينايتىن بولامىز. دەڭگەيى جوعارى. جەڭىستەرىڭىزبەن قۇتتىقتايمىن. ءبىزدىڭ قۇراما 3 ۋنيۆەرسيتەتتىڭ ستۋدەنتتەرىنەن جاساقتالدى. كوماندادا 17 عانا حوككەيشى بار. ەكەۋى جاراقات الىپ قالدى. كەلەسى ويىنعا تىڭعىلىقتى دايىندالامىز، - دەدى.
ايتا كەتەيىك، «حالىق ارەنادا» وتكەن ويىندا قازاقستان ستۋدەنتتەر قۇراماسى قىتايدى 22:0 ەسەبىمەن ۇتتى. وتانداستارىمىز كەلەسى ويىنىن 31 -قاڭتار كۇنى شۆەتسياعا قارسى وتكىزەدى.
