ماسكەۋدە دۇكەن قوجايىنى قازاق جاستارىن قۇلدىقتا ۇستاعان

استانا. قازاقپارات - شىمكەنتتىك جانىبەك قانىبەك پەن نەسىبەلى يبراگيموۆا تۇتقىندا بولعانىن مالىمدەگەننەن كەيىن ماسكەۋدەگى اتىشۋلى ازىق- تۇلىك دۇكەنىنىڭ ەسىگىنە قۇلىپ سالىنعان.

وتانداستارىمىز وندا كۇنكورىس قامىمەن بارىپ، قارا جۇمىسقا جەگىلگەن ەدى. ءتىپتى قوجايىنداردان كورمەگەن قورلىعى قالماعان.

قاراپايىم جۇك تاسۋشى بولۋ ءۇشىن شەكارا اسىپ، ەلگە ءولىمشى كۇيىندە ورالعانداردىڭ ءبىرى - جانىبەك قانىبەك. 18 جاسىندا قۇلدىقتىڭ قۇربانى بولعان ول ماسكەۋدە وتكەن 2 جارىم جىلىن توزاققا تەڭەيدى.

«ازاپتايدى، ۇرادى، سوعادى. تاماق جوق. ۇيقىسى تىنىش ەمەس. قىز بالاسىن زورلايدى، ءسوزدىڭ اشىعى. قويمادا ۇيىقتايتىنبىز ول جاقتا. بەتوندا كادىمگى» ، - دەپ ەسكە الدى جانىبەك قانىبەك.

نەسىبەلى يبراگيموۆا دا ءدال سول قوجايىنداردىڭ الداۋىنا تۇسكەن. باستاپقىدا ۋادە ەتىلگەن جالاقىعا قىزىققان ول ماسكەۋگە وتكەن جىلدىڭ مامىر ايىندا بارىپتى. ءسويتىپ، 8 اي بويى قارا جۇمىسقا جەگىلىپ، كادىمگى جۋىندىمەن تاماقتانعان.

«ەسىمە العىم دا كەلمەيدى. ءبىر ايدا ءبىر رەت سويلەستىرگىزەدى. وزدەرى ۇستاپ تۇرادى تەلەفوندى» ، - دەيدى نەسىبەلى يبراگيموۆا.

بۇلار قاشۋعا تالاي تىرىسقان. ءبىراق ونىسى ناتيجەسىز بولىپ، قارا سۋىق جەرتولەگە اپتالاپ قامالعان كەزدەرى دە بولىپتى. قايتا، قۇلدىققا تۇسكەن جىگىتتىڭ ءبىر ارەكەتى جۇزەگە اسىپ، ءتۇرلى قيىندىقپەن ەلگە ورالعان. ال نەسىبەلىنىڭ بوستاندىققا شىعۋىنا ماسكەۋلىك ەرىكتىلەر كومەكتەسكەن.

«نەسىبەلى مەنىڭ ۇيىمدە 3 اپتا بويى تۇردى. دۇكەننەن الىپ شىققاندا ءۇستىنىڭ ساۋ تامتىعى جوق. دارىگەرلەرگە كورسەتىپ، ەم جاسادىق. 2012 -جىلى دا وسىلاي قۇلدىققا تۇسكەن بىرنەشە ادامدى قۇتقارعانبىز. دۇكەن سوندا دا جابىلماعان» ، - دەيدى «التەرناتيۆا» قوزعالىسىنىڭ مۇشەسى الەكسەي نيكيتين.

5  جىل بۇرىن دا وسى اتىشۋلى دۇكەندە قۇل بولعان وتانداستارىمىز قۇتقارىلعان ەكەن. ءسويتىپ، ەلىمىزدەگى قۇقىق قورعاۋشىلار رەسەيلىك ارىپتەستەرىمەن بىرىگىپ ءىس قوزعاپتى. ءبىراق سول كۇيى اياقسىز قالسا كەرەك. ەندى، نەسىبەلى مەن جانىبەكتىڭ جاعدايىنان كەيىن ماسەلە قايتا كوتەرىلىپ وتىر.

«قازاقستانداعى ادام قۇقىقتارى جونىندەگى قازىرگى كەزدە رەسەيدەگى ومبۋدسمەنعا سونداي سۇرانىس جىبەرىپ، بىرلەسىپ، باقىلاۋعا الۋ جونىندە ءىس جۇرگىزىلۋدە» ، - دەيدى ادام قۇقىقتارى جونىندەگى ۇلتتىق ورتالىقتىڭ باسقارما باسشىسى دينارا وسپانوۆا.

ال، وسى شۋ شىققاننان كەيىن تۇرمەدەن بەتەر دۇكەن بىردەن جابىلعان. ەسىگىنە ءمور باسىلعان نىساننىڭ اينالاسىندا ءتىرى جان كورىنبەيدى.

دەگەنمەن بۇل قوجايىنداردىڭ قۇلدىق جايلاعان جالعىز دۇكەنى ەمەس. ازاپتان قۇتىلعاندار ماسكەۋدە ءالى تالاي قاراكوزدىڭ قالعانىن ايتىپ وتىر. سوندىقتان بۇل جولى دا جابۋلى قازان جابۋلى كۇيىندە قالماسا دەيدى. ايتا كەتسەك، وتانداستارىمىزدى قۇلدىقتا ۇستاعاندار رەسەي ازاماتتىعىن العان ءوزىمىزدىڭ قازاقتار.

КТК