ورالدا مال تەرىسىن وڭدەيتىن زاۋىت سالىنۋدا

ورال. قازاقپارات - بۇگىن باتىس قازاقستان وبلىسىنىڭ اكىمى «پوش رۋنو» ج ش س سالىپ جاتقان، ءىرى قارا جانە ۇساق مال تەرىسىن وڭدەيتىن زاۋىت قۇرىلىسىمەن تانىستى، دەپ حابارلايدى «قازاقپارات» ح ا ا ءتىلشىسى.

قازىرگى كەزدە ەداۋىر جۇمىسى ءبىتىپ قالعان زاۋىتتا يسپاندىق جانە يتالياندىق قۇرال- جابدىقتار ورناتىلۋدا. كۇنى بۇگىن قۇرىلىسقا 40 جەرگىلىكتى تۇرعىن تارتىلسا، جوبا ىسكە قوسىلعان كەزدە 84 جۇمىس ورنى اشىلماق. زاۋىت تولىق قۋاتىنا كوشكەن ۋاقىتتا جىلىنا 182 مىڭ ءىرى قارا، 624 مىڭ ۇساق مالدىڭ تەرىسىن وڭدەيتىن بولادى.

«مال شارۋاشىلىعى جاقسى دامىعان باتىس قازاقستان ءۇشىن بۇل - بىرەگەي جوبا. ەندى شارۋالار مەن اۋىل تۇرعىندارىنا تەرى وتكىزىپ، قوسىمشا تابىس تاباتىن ورىن دا پايدالانۋعا بەرىلمەك»، دەدى التاي كولگىنوۆ.

ايتا كەتەيىك، وڭىردە ءجۇن، تەرى وڭدەيتىن كاسىپورىن بولماعاندىقتان، تۇرعىندار ونى كوبىنەسە دالاعا تاستاپ كەلگەن ەدى.