تاسماعامبەتوۆ الاش قايراتكەرى احمەت بايتۇرسىن ۇلىنىڭ مۇراجاي ۇيىندە بولدى

استانا. قازاقپارات - بۇگىن قازاقستان رەسپۋبليكاسى پرەمەر- ءمينيسترىنىڭ ورىنباسارى يمانعالي تاسماعامبەتوۆ الماتى قالاسىنداعى الاش قايراتكەرى، عۇلاما عالىم احمەت بايتۇرسىن ۇلىنىڭ مۇراجاي ۇيىنە ارنايى بارىپ، تاريح جانە مادەنيەت ەسكەرتكىشى سانالاتىن مۋزەي ءۇيىنىڭ جىلدار بويى قوردالانعان ماسەلەلەرىنىڭ شەشىلۋىنە مۇرىندىق بولماق.

ەلىمىزدىڭ ساياسي تاۋەلسىزدىگى جولىندا كۇرەسىپ، رۋحاني مادەنيەتىمىزدىڭ كوشباسشىسى بولعان احمەت بايتۇرسىن ۇلىنىڭ ەسىمى مەن ەڭبەكتەرىن ۇزاق ۋاقىت بويى ايتۋعا تىيىم سالىپ، «تۇمشالاپ» كەلگەنىمەن، ايتۋلى تۇلعا ەڭبەگى حالقى ءۇشىن ماڭگىلىك وشپەيتىندىگىن مويىنداتتى.

 ا. بايتۇرسىن ۇلى مۇراجاي ءۇيىنىڭ ديرەكتورى رايحان ساحىبەك قىزى ۆيسە- پرەمەر يمانعالي تاسماعامبەتوۆتى مۇراجاي جۇمىسىمەن جانە اقىننىڭ جادىگەرلەرىمەن تانىستىرا وتىرىپ، تۇيتكىلدى ماسەلەلەردىڭ بار ەكەنىن جەتكىزدى.

 ۆيتسە- پرەمەر ءوز كەزەگىندە الاش زيالىلارىنىڭ قۇندى مۇرالارىن جيناقتاپ، ساقتاۋعا كەلگەندە ايانباي ەڭبەك ەتۋ قاجەت ەكەنىن ايتا وتىرا، وسى دۇنيەلەردىڭ قۇندىلىعىنا دا ەرەكشە توقتالدى.

«1934-1937 -جىلدارى اقىن تۇرعان وسىناۋ كيەلى شاڭىراق - تاريح پەن تاعىلىمنىڭ ورداسى. بۇل ءۇيدىڭ ءاربىر كىرپىشى مەن بۇرىشى احاڭنىڭ قيىن دا قاسىرەتتى تاعدىرىنان سىر شەرتەدى. سوندىقتان، ءبىز بۇل تاريحي ەسكەرتكىشتى ساقتاۋعا، ونىڭ ءبىلىم مەن عىلىمنىڭ، ءتالىم مەن تاربيەنىڭ ورداسى رەتىندە دامىتۋعا ءتيىسپىز»، - دەدى يمانعالي تاسماعامبەتوۆ.

ۇكىمەت تاراپىنان قايراتكەردىڭ عىلىمي ەڭبەكتەرىن زەردەلەۋدى جەتىلدىرۋ ماقساتىندا قازاقستان رەسپۋبليكاسى پرەمەر- ءمينيسترىنىڭ ورىنباسارى يمانعالي تاسماعامبەتوۆ مۇراجايعا ۇلتتىق مارتەبەسىن بەرۋ، احمەت بايتۇرسىن ۇلى شىعارمالارىنىڭ 10 تومدىعىن شىعارۋ جانە دەرەكتى فيلم ءتۇسىرۋ جونىندە تاپسىرما بەردى. قويىلعان مىندەتتەردى جۇزەگە اسىرۋ ءۇشىن كەلەسى اپتادا استانادا ارنايى كەڭەس وتكىزىلەتىندىگى ايتىلدى.

 ايتا كەتەيىك، 1934-1937 -جىلدار ارالىعىندا احمەت بايتۇرسىنوۆ تۇرعان ءۇي مۇراجاي رەتىندە 1998 - جىلى اقىننىڭ 125 جىلدىق مەرەيتويى قارساڭىندا رەسمي تۇردە اشىلعان. سونداي- اق، بيىل الاش قوزعالىسىنىڭ قۇرىلعانىنا 100 جىل تولادى.