ەرىك سۇلتانوۆ اۋدان اكىمدەرىنىڭ جۇمىسىن سىنعا الدى
قارجى باسقارماسى باسشىسىنىڭ مىندەتىن اتقارۋشى ناتاليا دىشكانتتىڭ ايتۋىنشا، 36,1 ميلليارد تەڭگەگە جوسپارلانعان جەرگىلىكتى بيۋدجەتكە 37,5 ميلليارد تەڭگە جەكە كىرىستەر تۇسكەن، ياعني بۇل 103,8 پايىزدى قۇرايدى. وبلىستىق بيۋدجەتتىڭ نەگىزگى كىرىس كوزىن جەكە تابىس سالىعى قۇراپ وتىر. «وبلىس ورتالىعى بويىنشا جوسپاردان تىس 252,4 ميلليون تەڭگە، تايىنشا اۋدانى - 3,3 ميلليون تەڭگە ءتۇسىردى. ايماقتىڭ قالعان اۋداندارىندا بولجام ورىندالمادى»، - دەدى ناتاليا دىشكانت.
«مەن وبلىس اكىمىنىڭ اپپارات باسشىسىنا كىرىستەر بويىنشا جوسپاردى ورىنداماعان اكىمدەرگە سوگىس بەرۋ تۋرالى بۇيرىق ازىرلەۋدى تاپسىرامىن»، - دەدى ەرىك سۇلتانوۆ.
ءوڭىر باسشىسى اۋدان اكىمدەرىنىڭ مەملەكەتتىك ساتىپ الۋدى وتكىزۋ جۇمىستارىن سىنعا الدى.
ناتاليا دىشكانت حابارلاعانداي، بيىلعى جىلى جەرگىلىكتى اتقارۋشى ورگاندار تاراپىنان 46,9 ميلليارد تەڭگە سوماسىنداعى 18777 مەملەكەتتىك ساتىپ الۋ جوسپارلانعان. بيۋدجەتتىك باعدارلامالاردىڭ وبلىستىق اكىمشىلەرى 22 ميلليارد تەڭگە سوماسىندا - 7034 مەملەكەتتىك ساتىپ الۋلار بەلگىلەگەن، سونىڭ ىشىندە 11,4 ميلليارد تەڭگەگە 482 تاپسىرىس جاريالاعان.
بيۋدجەتتىك باعدارلامالاردىڭ اۋداندىق اكىمشىلەرى جالپى سوماسى 11,8 ميلليارد تەڭگەلىك 10347 مەملەكەتتىك ساتىپ الۋلار، سونىڭ ىشىندە 4,9 ميلليارد تەڭگەلىك 240 تاپسىرىس جاريالانعان.
