ديماش قىتايلارعا قازاقشا ۇيرەتىپ جاتىر

استانا. قازاقپارات - «Singer-2017» ءان بايقاۋىنا قاتىسىپ، قىتايلىق كورەرمەندەردى تاڭ- تاماشا ەتكەن وتانداسىمىز ەرتەڭ بايقاۋدىڭ ەكىنشى كەزەڭىندە ونەر كورسەتەدى.

جوبانىڭ ءبىرىنشى كەزەڭىندە ەرەكشە كوزگە تۇسكەن جەرلەسىمىز بۇل كۇندە وسى ەلدە ايتارلىقتاي جوعارى تانىمالدىلىققا يە بولدى. العاشقى ەفيردەن كەيىن ءانشىنىڭ Sina Weibo (تۋيتتەردىڭ بالاماسى) الەۋمەتتىك ميكروبلوگىنا جازىلۋشىلاردىڭ سانى ءبىر ساعاتتا 35 مىڭنان 118 مىڭعا جەتسە، بۇل كۇنى ولاردىڭ سانى 645 مىڭنان اسىپ كەتكەن.

ءانشىنىڭ Weibo-داعى قازاقشا ۇيرەتكەن ۆيدەونى كورىپ، قازاقشا ۇيرەنۋگە تىرىسقان قىتايلاردىڭ سانى 2 ميلليون 560 مىڭعا جەتكەن. 18 سەكۋندتىق ۆيدەودان، ديماش جانكۇيەرلەرىنە «مەن سەنى سۇيەمىن!» ءسوزىن ۇيرەتكەنىن بايقاۋعا بولادى.

ايتا كەتەرلىگى، قازاق ءانشىسى 28- قاڭتار كۇنى ەكىنشى كەزەڭدە باق سىنايدى. بۇعان دەيىن حابارلاعانىمىزداي، ءانشى ۆيتاستىڭ وپەرا2 ءانىن ورىنداماقشى.

اۆتور: مۇحتار قاليموللا ۇلى