قىزىلوردالىق پوليسەيلەر ۇرلانعان قويلاردى يەسىنە قوزىلارىمەن قوسىپ قايتاردى

قىزىلوردا. قازاقپارات - «قورادان قويىم ۇرلاندى»، دەپ ارىز بەرگەن ازاماتتىڭ جانايقايى بەكەر بوپ شىقتى، دەپ حابارلادى قازاقپارات ح ا ا ءتىلشىسى وبلىستىق ءى ءى د سىلتەمە جاساپ.

 «قاڭتار ايىنىڭ 22-سىنەن 23-نە قاراعان ءتۇنى شيەلى اۋدانى ەڭبەكشى اۋىلىنا قاراستى «جالعىز اعاش» اۋىلىنىڭ تۇرعىنى قوراسىندا تۇرعان 2 باس قويىن بەلگىسىز بىرەۋلەر ۇرلاپ كەتىپ، جالپى قۇنى  50000 تەڭگە شىعىن كەلتىرگەنىن كورسەتىپ، اۋداندىق ىشكى ىستەر بولىمىنە ارىزدانعان بولاتىن. اتالعان ارىز نەگىزىندە قازاقستان رەسپۋبليكاسى قىلمىستىق كودەكسىنىڭ 188-بابى 2-بولىگى بويىنشا قىلمىستىق ءىس قوزعالىپ، جەدەل- ىزدەستىرۋ شارالارى جۇرگىزىلدى. ناتيجەسىندە قويلار اتالعان جايىلىمدىق جەردە قالىڭ جىڭعىل اعاشتاردىڭ اراسىندا تولدەپ جاتقان جەرىنەن تابىلىپ، ەشقانداي ۇرلىق قىلمىسى ورىن الماعاندىعى بەلگىلى بولدى. ەكى قوي تولدەگەن 2 باس قوزىلارىمەن بىرگە يەسىنە قايتارىلدى»، دەلىنگەن حابارلامادا.

اۆتور: ەلۋباي اۋەزوۆ