سارا توقتامىسوۆا: قازاقتىڭ ءاپ- ادەمى قىزدارى كينودا جىگىتتەرمەن ايمالاسىپ ءجۇر

استانا. قازاقپارات - ايتىسكەر اقىن سارا توقتامىسوۆا ءار كينودا ءار جىگىتپەن ايمالاسىپ، عاشىق قىزدىڭ ءرولىن وينايتىن اكتريسالارعا قاتىستى ءوز ويىن ءبىلدىردى.

بۇل تۋرالى ول جەلىدەگى پاراقشاسىندا جازدى.

"جاڭا ءبىر كليپ كوردىم. قازاقتىڭ ءاپ- ادەمى قىزى. قازاقشا سايراپ تۇر. وتكەندە 2-3 كينودان كوزىم شالىپ قالىپ ەدى، ءار كينودا ءارتۇرلى جىگىتپەن قۇشاقتاسىپ، قۇشاقتاسقانى بىلاي تۇرسىن، ايمالاسىپ وبرازعا كىرىپ- اق ءجۇر.

 ەندى كليپتەردە دە ءتۇرلى جىگىتتەرمەن تاعى وشپەس سەزىم، ساعىنىپ قوسىلعان ماحابباتتى كورسەتىپ ءجۇر، نەسىن ايتاسىڭ. عاشىق جاننىڭ رولىندە وينايمىن دەپ نەبىر سيپاتتاعى كادرلەردى سومداپ- اق ءجۇر"، - دەگەن اقىن قىزداردىڭ بولاشاعىنا الاڭدادى.

"ەرتەڭگى كۇنى بۇل قىز تۇرمىس قۇرادى، انا بولادى. سوندا جۇبايىمەن بىرگە جايباراقات مىنا كينو، كليپتەرىن ساراپتاپ كورە بەرەدى عوي ءيا؟ ! بالا- شاعاسىنا "مىنە مەن ويناعان تۋىندىلار"- دەپ ۇيالماي كورسەتە بەرە مە؟ قازاقتىڭ قانشا ورىمدەي قىزدارى "تۋرا سول سياقتى بولساق" دەپ الدىنا ارمان، ماقسات قويادى، قيالدايدى. "وندا تۇرعان نە بار؟ " دەگەن سويلەمدى كولدەنەڭ قويىپ الادى دا، ار جاعىن ءبىلىپ وتىرسىزدار"، - دەپ نارازىلىعىن ءبىلدىردى اقىن.